25 август куни Afrosiyob тезюрар поезди «Тошкент-Бухоро» йўналиши бўйлаб биринчи рейсини амалга оширди, хабар бермоқда «Ўзбекистон темир йўллари» матбуот хизмати.

Поезд Тошкент ва Бухоро оралиғидаги 600 километрдан зиёдроқ масофани 3 соату 20 дақиқада босиб ўтади. Авваллари ушбу йўл учун 7−8 соат сарфланар эди.

«Самарқанд-Бухоро» темир йўл участкасини электрлаштириш бўйича лойиҳа доирасида мавжуд йўл реконструкция қилинди, янгилари бунёд этилди ва 259 километр узунликдаги йўл электрлаштирилди. Қиймати 400 миллион АҚШ долларини ташкил этувчи лойиҳа 16 ой давомида амалга оширилди.

Тезюрар поезд ўтадиган йўл бўйлаб 222 та сунъий иншоот, жумладан, 1 та пиёдалар ўтиш йўли, 4 та йўл ўтказгич ва 4 та кўприк қурилди. Электр энергияси билан узлуксиз таъминлаш учун 4 та электр станцияси тўлиқ реконструкция қилиниб, замонавий техник жиҳозлар билан таъминланди.

Магистрал йўлнинг ҳар икки томонида 500 километрлик метал панжаралар ўрнатилди. Қаттақўрғон туманида бир вақтнинг ўзида 100 йўловчига хизмат кўрсатадиган замонавий қиёфадаги янги вокзал бунёд этилди.

«Бухоро» вокзали биноси ҳам капитал таъмирланди. У бир вақтнинг ўзида 300 нафардан зиёд йўловчига хизмат кўрсатишга мўлжалланган.

Мазкур участкадан тезюрар поезди ҳаракатининг бошланиши билан Ўзбекистонда тезюрар тармоқлар узунлиги 700 километрдан ошди.