Самарқандда жойлашган JV Man Auto Uzbekistan қўшма корхонаси оғир юк кўтарувчи MAN транспорт воситалари учун кабиналар ишлаб чиқаришни маҳаллийлаштириш ва янги технологияларни жорий этиш лойиҳаси ишга туширилганини эълон қилди, дея хабар тарқатди ЎзА.
«Man Truck&Bus АG саъй-ҳаракатлари билан корхонамизда тайёрланаётган MAN оғир юк кўтарувчи транспорт воситалари учун йилига 3 минг дона кабина ишлаб чиқаришни маҳаллийлаштириш бўйича лойиҳани амалга оширдик», — дейди JV Man Auto Uzbekistan қўшма корхонаси янги лойиҳалар ва маҳаллийлаштириш департаменти директори Ойбек Аюбов.
Кабина ишлаб чиқариш жараёни пайвандлаш, бўяш ва йиғиш циклида амалга оширилади. Кабинанинг металл панеллари Хитойдаги SINOTRUK IMPORT&EXPORT CO LTD компанияси томонидан етказиб берилади ва корхонада пайвандланади. Сўнгра Самарқанд автомобиль заводи бўяш цехи базасида емирилишга қарши қатлам сурилиб, бўялади. Бўялган кабиналар JV Man Auto Uzbekistan қўшма корхонасига келтирилиб, ички ва ташқи жиҳозларини ўрнатиш каби сўнгги йиғув ишлари бажарилади.
Кабиналарни серияли ишлаб чиқаришга жорий йилнинг сентябрь ойидан киришилади.
JV MAN Auto Uzbekistan ҚК 2009 йилда «Ўзавтосаноат» ва Германиянинг MAN Truck & Bus Group компаниялари ҳамкорлигида ташкил этилган. Бугунги кунда муассасада тўлиқ вазни 16 тоннадан ортиқ бўлган юк машиналари ва махсус транспорт воситалари ишлаб чиқарилмоқда.
