РИА Новости — Жума куни кечқурун Мюнхендаги «Олимпия» савдо маркази ҳудудида содир этилган қуролли босқинчилик оқибатида тўққиз киши қурбон бўлди, 16 киши шифохонага ётқизилди; полиция хабарига кўра, отишмани 18 ёши келиб чиқиши эронлик бўлган шахс содир этган.
Полициянинг маълум қилишича, жиноятчи якка ҳаракат қилган ва охир-оқибат ўз жонига қасд қилган.
«Ҳозирги вақтда терговда мавжуд бўлган маълумотларга кўра, гумондор — Мюнхендан бўлган 18 ёшли келиб чиқиши эронлик немис», — деди шаҳар полицияси раҳбари Хубертус Андре журналистларга.
«Олимпия» савдо маркази яқинида ўткинчиларга қарата тўппончадан ўқ узган гумондор, дастлабки маълумотларга кўра, ўз жонига қасд қилган, аммо Андренинг таъкидлашича, бу фақатгина дастлабки ахборот.
Мюнхен полицияси раҳбарининг қайд этишича, жиноятчи қандай сабабларга кўра отишмани содир этгани ҳозирча номаълум. Унинг сўзларига кўра, ҳозирча теракт ҳақида гапиришга вақтли, чунки жиноятчининг важи аниқлангани йўқ. «Аввалига жиноятчи кимлар билан алоқага киришганига ойдинлик киритиб олиш зарур», — деди у.
Отишма содир этилаётган вақтда ҳужум қилган шахснинг елкасида рюкзаги бўлгани сабабли унинг ичида портловчи модда бор, деган шубҳалар билдирилди, бироқ кейинчалик бу тахмин тасдиғини топмади.
