24 июнь куни «Тошкент» халқаро аэропорти 13:00 дан 18:00 гача йўловчи рейслари учун ёпиқ бўлади, дея хабар қилди «Ўзбекистон ҳаво йўллари» матбуот хизмати. Бу Шанхай ҳамкорлик ташкилоти саммитида иштирок этадиган расмий делегациялар самолётларининг парвозлари билан боғлиқ.

Шу кунга мўлжалланган «Ўзбекистон ҳаво йўллари» рейслари 18:00 дан сўнг амалга оширилади. Миллий авиакомпания вақтинчалик ноқулайлик учун ўз узрини сўради.

Бундан аввалроқ хорижий делегациялар келиши ва кетиши муносабати билан 23 ва 24 июнь кунлари рейслар жадвалига ўзгартишлар киритилиши мумкинлиги ҳақида хабар қилинган эди. Йўловчиларга парвозларнинг аниқ муддатларини аэропорт маълумотхонасига қўнғироқ қилиб аниқлаб олиш тавсия этилмоқда.