Ўзбекистон Вазирлар Маҳкамаси 2 июнь куни «Электрон давлат хизматларини кўрсатиш тартибини такомиллаштириш чоралари тўғрисида»ги қарорни қабул қилди. Ҳужжат 10 июндан кучга кирадиган «Электрон ҳукумат тўғрисида»ги қонунни амалга татбиқ этиш доирасида қабул қилинди.
Ахборот технологиялари ва коммуникацияларни ривожлантириш вазирлиги матбуот хизматининг хабар қилишича, ҳужжатда давлат хизматларини электрон шаклда кўрсатиш жараёнида ортиқча оворагарчиликларнинг олдини олиш, аҳоли ва бизнес вакилларидан талаб қилинадиган ҳужжат ва сўровларни қисқартириш, хизмат кўрсатиш жараёнини соддалаштириш, шунингдек, давлат органлари ҳужжатларини ягона шаклга келтириш каби вазифалар белгилаб берилган.
Электрон давлат хизматларини кўрсатишни такомиллаштириш тартиби бир неча босқичдан иборат. Аввалига аҳоли ва бизнес вакилларига кўрсатиладиган, талаб юқори бўлган хизматлар таҳлиллар асосида аниқлаб олиниб, самарали хизмат кўрсатиш билан боғлиқ тўсиқлар ўрганилади.
Шундан сўнг электрон хизматларни кўрсатишнинг энг мақбул усули ишлаб чиқилиб, қонунчилик доирасида жамоатчилик ва экспертлар фикр-мулоҳазаси асосида такомиллаштирилади.
Айни пайтда Ахборот технологиялари ва коммуникацияларини ривожлантириш вазирлиги ва унинг қошидаги «Электрон ҳукумат» тизимини ривожлантириш маркази, БМТнинг Тараққиёт дастури, Осиё тараққиёт банки, халқаро экспертлар билан биргаликда бир қанча давлат хизматларини электрон шаклга ўтказиш юзасидан ҳамкорлик олиб бормоқда.
«Электрон ҳукумат тўғрисида»ги Қонун Президент Ислом Каримов томонидан ўтган йилнинг 9 декабрь куни имзоланган эди. Юқоридагилардан ташқари, қонунда электрон давлат хизматлари регламентини ишлаб чиқиш, шунингдек, вазирликлараро электрон алоқа ва электрон ҳукуматнинг ягона идентификаторлари (жисмоний ва юридик шахслар, кадстр, кўчмас мулк, географик ва бошқа объектларни аниқлаштиришга имкон берадиган ўзига хос кодлар) кўзда тутилган.
