27 май куни электрлаштирилган Ангрен-Поп участкасида синов режимида илк поезд олиб ўтилди, дея хабар қилди «Ўзбекистон темир йўллари» АЖ ахборот хизмати. Таркиб «Қамчиқ» туннели ичидаги темир йўл тармоғининг 11-километрида рельслар туташтирилганидан сўнг Ангрен станциясидан Поп станциясигача бўлган машрутни амалга оширди.
Ангрен-Поп темир йўл тармоғининг узунлиги 123,1 километр бўлиб, жумладан, туннел узунлиги 19,1 километрни ташкил этади.
Эслатиб ўтамиз, туннелдаги барча бурғулаш ишлари хитойлик ҳамкорлар — China Railway Tunnel Group томонидан, пўлат изларни ётқизиш юмушлари — «Ўзбекистон темир йўллари» кучлари ҳисобига амалга оширилди. Айни вақтда лойиҳанинг якунловчи қисми — йўлларни электрлаштириш ва муҳандислик ишлари амалга оширилмоқда.
2015 йил август ойининг охирида мазкур лойиҳанинг 104 километрида тупроқ, кўприклар, сунъий иншоотлар, пўлат излар ётқизиш, электрлаштириш, шунингдек, вокзал ва станциялар қуриш ишлари тўлиқ тугатилган эди. Туннелда эса жорий йилнинг февраль ойида бурғулаш ва ковлаш ишлари ниҳоясига етказилиб, иккала томондан туннелнинг асосий стоволи туташтирилди.
