Сенегаллик дипломат аёл Фатма Самура Халқаро футбол федерациясининг Бош котиби этиб сайланди. Бу ҳақда Мексикада ўтказилаётган FIFAнинг 66-конгрессида ташкилот раҳбари Жанни Инфантино маълум қилди, дея хабар бермоқда Ўзбекистон Миллий Олимпия қўмитаси матбуот хизмати.
Маълумотларга кўра, Халқаро футбол федерациясининг 112 йиллик тарихида Бош котиб лавозимига илк бор европалик мутахассис тайинланмади. Бундан ташқари ташкилот Бош котиби лавозимига биринчи маротаба аёл киши сайланди. Фатма Самура бунга қадар 20 йил давомида БМТда фаолият кўрсатган.
Таъкидлаш жоизки, бунга қадар Самуранинг футболга умуман алоқаси бўлмаган. Фатма Самурага қадар Халқаро футбол федерацияси Бош котиби лавозимини Маркус Каттнер эгаллаб келаётган эди. Маркус Каттнер эса ўтган йили футболдан 12 йилга четлаштирилган Жером Валке ўрнига Бош котиб лавозимини эгаллаб турган эди.
