Хитойнинг Huawei Technologies компанияси «Ўзбектелеком» билан ҳамкорликда яқин вақтлар ичида «Жиззах» эркин иқтисодий зонасида оптик тармоқларни қуриш учун телекоммуникация ускуналарини ишлаб чиқаришни йўлга қўяди. Бу ҳақда «Газета.uz»га Huawei Technologies`нинг Тошкентдаги ваколатхонаси матбуот хизмати хабар қилди.
Huawei ҳамда «Ўзбектелеком» билан тенг шерикчиликда барпо этилган Broadband Solutions ҚК станцион ва кўча тақсимловчи ускуналари, шунингдек, xPON (passive optical network — пассив оптик тармоқ) технологияси базасида тармоқларни қуриш учун абонент терминалларини ишлаб чиқаради.
Huawei учун бу Ўзбекистондаги биринчи КҚ. Яқин истиқболда корхона маҳсулотларини ички бозорга етказиш, келгусида эса ташқи бозорга экспорт қилиш режалаштирилган.
«Телекоммуникация ускуналарини ишлаб чиқаришни ташкил этиш (оптик тармоқни қуриш учун фаол элементлар)» лойиҳасининг умумий қиймати 3 млн АҚШ долларидан иборат («Ўзбектелеком» улуши — 51%).
«Ўзбектелеком» айни вақтда FTTB (fiber-to-the-building, «толалар уйга қадар») технологияси асосида кенг полосали тармоқларни бунёд этмоқда. Технология замонавий рақамли телефон алоқаси, рақамли форматдаги ТВ, 100 Мбит/с гача тезликдаги интернетга кенг полосали уланиш хизматларини кўрсатиш ҳамда абонентлар учун IPTV сингари янги хизматларни кўрсатишга имкон туғдиради.
Huawei Technologies компанияси билан ҳамкорликдаги лойиҳа Ўзбекистон Президентининг 2013 йил 18 сентябрдаги «Хитой Халқ Республикаси Раиси Си Цзиньпиннинг Ўзбекистон Республикасига ташрифи жараёнида имзоланган шартномаларни амалга ошириш ва икки томонлама ҳамкорликни янада ривожлантириш чора-тадбирлари тўғрисида»ги қарори талабларига мос равишда амалга оширилмоқда.
Бугунги кунда Тошкентда 70 фоизга яқин кўп хонадонли уйлар оптик толали тармоққа уланган. Яқин йилларда мазкур хизматни республиканинг бошқа ҳудудларида ҳам кенгайтириш режалаштирилган.
