Бухоро нефть ва газ саноати касб-ҳунар коллежида Россиянинг «ЛУКОЙЛ» компанияси кўмагида иккита электрон таълим ўқув хонаси очилди. 28 апрель куни бўлиб ўтган ўқув хоналарининг очилиши маросимида Бухоро ҳокими Валижон Ўринов ҳамда «ЛУКОЙЛ Узбекистан Оперейтинг Компани», «Ўзбекнефтгаз» ва бошқа ташкилотлар вакиллари иштирок этди.
«Ўқув хоналари, шу жумладан, „ЛУКОЙЛ“ компанияси ҳисобига жиҳозланган электрон таълим кабинетининг очилиши Бухоро нефть ва газ саноати касб-ҳунар коллежи ҳамда „ЛУКОЙЛ Узбекистан Оперейтинг Компани“ ўртасида фаол ҳамкорлик босқичи бошланганидан дарак беради», — дея таъкидлади коллеж директори Маликжон Муродов.
«ЛУКОЙЛ» ташкилий ривожланиш ва хизматни бошқариш департаменти бошлиғи Юрий Пихтовниковнинг қайд этишича, компания Бухоро нефть-газ коллежини биринчи навбати 2018 йилда ишга тушиши режалаштирилган Қандим газни қайта ишлаш мажмуасининг бўлғуси ходимларини тайёрловчи майдонча сифатида кўриб чиқмоқда.
Коллеждаги ўқув хоналар очилиши билан Қандим ГҚИМда ишлаш уун ходимларни тайёрлаш мақсадида «ЛУКОЙЛ Узбекистан Оперейтинг Компани» ходимлари ва коллеж ўқувчиларининг ўқув курслари бошлаб юборилди.
