Тошкентдаги Турин потитехника университети янги ўқув йилида 100 нафар бакалаврни кўпроқ қабул қилади. Ўзбекистон Вазирлар Маҳкамасининг 18 апрелдаги қарори билан тасдиқланган қабул квотаси 350 кишини ташкил этади (ўтган йили — 250). Бу ҳақда ОТМ сайтида хабар қилинди. Магистратурага қабул қилинадиган талабалар сони 25 кишидан ибоарт (ўтган йилгидек).
«Машинасозлик технологияси» мутахассислигига 200 талаба қабул қилиниши режалаштирилган (ўтган йили — 150), «Ахборот технологиялари ва саноатда АБТ» — 100 талаба (50), «Энергетика» ҳамда «Саноат-фуқаролик қурилиши ва архитектура» — 25 талабадан (ўтган йилгидек).
«Машинасозлик технологияси» мутахассислиги бўйича магистратурага 25 киши қабул қилинади. Ўтган йили худди шунча талаба «Мехатроника» йўналишига қабул қилинган эди.
Қарорда қайд этилишича, қабул квотасининг оширилиши иқтисодиётнинг реал секторида машинасозлик, энергетика, саноат ва фуқаролик қурилиши, ахборот технологиялари соҳаларида олий маълумотли мутахассисларга бўлган талабнинг ортиши билан изоҳланди.
Тошкентдаги Турин политехника университети Президентнинг 2009 йил 27 апрелдаги қарори билан таъсис этилган. Шу йили илк талабалар қабул қилинган. ОТМда магистратура бўлими 2013 йилда очилди.
