Бош прокуратура «Коррупция — миллий хавфсизликка таҳдид» тарғибот тадбирлари дастурини амалга оширишда давом этмоқда. Халқ таълими соҳасидаги суиистеъмолчилик ҳолатлари ва коррупциянинг олдини олиш масаласига бағишланган навбатдаги учрашув Халқ таълими вазирлигида ўтказилди, дея хабар қилди Бош прокуратура матбуот хизмати.

Видеоконференцалоқа имкониятларидан фойдаланган ҳолда ташкил этилган ушбу учрашувда Халқ таълими вазири, ўринбосарлари, вазирликнинг таркибий тармоқлари раҳбарлари, Қорақалпоғистон Республикаси халқ таълими вазири, Тошкент шаҳар ва вилоятлар халқ таълими бошқармалари бошлиқлари, олий ўқув юртлари ректорлари, халқ таълими муассасалари фаолиятини методик таъминлаш ва ташкил этиш туман (шаҳар) бўлимлари мудирлари иштирок этди.

Тадбирда Бош прокуратура масъул ходимининг халқ таълими соҳасида қонунийлик ҳолати, соҳада коррупциянинг олдини олиш борасида 2015 йилда амалга оширилган чора-тадбирларнинг мониторинги таҳлили натижалари ҳақидаги маърузаси эшитилди ҳамда ушбу йўналишдаги тадбирларнинг сифатини янада ошириш бўйича вазифалар муҳокама қилинди.

Шунингдек, Бош прокуратура томонидан тайёрланган коррупциянинг олдини олишга бағишланган видеоматериаллар намойиш этилди.

Учрашувда Ички ишлар вазирлиги ва Республика маънавият тарғибот маркази вакиллари ҳам мавзуга доир маърузалар билан иштирок этди.

Тадбир якунида келгусидаги профилактик тадбирларни амалга ошириш бўйича ҳамкорликдаги комплекс чора-тадбирлар белгилаб олинди.

Қайд этиш жоизки, ХТВ вазирлиги расмий сайтида «Коррупция — миллий хавфсизликка таҳдид» деб номланган алоҳида бўлим очилган бўлиб, унда вазирликнинг порахўрликка қарши курашга оид буйруқлари, шахсий саволларга жавоблар, вазирликнинг ҳудудий бўлинмалари алоқа рақамлари жойлаштирилган.