Бандлик ва меҳнат вазири Ли Гиквон раҳбарлигидаги Корея Республикаси делегацияси шанба куни Самарқандга ташриф буюрди, дея хабар берди Ўзбекистон Меҳнат вазирлиги ахборот хизмати.
Ташриф доирасида корейс делегацияси Самарқандда Корея халқаро ҳамкорлик агентлиги (KOICA) кўмаги билан барпо этилаётган Касб-ҳунарга ўқитиш маркази қурилиши жараёни билан танишди.
Марказнинг қурилиши ўтган йилнинг март ойида бошланган эди. Бу каби биринчи марказ эса Тошкентда 2012 йилнинг июлида очилди. Лойиҳадан кўзланган мақсад Ўзбекистон пойтахти ва вилоятларида малакали техник мутахассисларнинг бирдек тақсимланишини ташкил этишдан иборат. Учинчи касбий таълим маркази Шаҳрисабз шаҳрида бунёд этилади.
Делегация, шунингдек, Самарқанд автомобилсозлик касб-ҳунар коллежига ҳам ташриф буюриб, у ердаги таълим олиш учун яратилган шарт-шароитлар билан танишиб, ўқувчилар билан суҳбат қуришди.
Бундан аввалроқ Корея Республикаси Бандлик ва меҳнат вазирлиги ҳамда Ўзбекистон Меҳнат вазирлиги бандликка рухсат бериш тизими орқали ишчи кучини Корея Республикасига юбориш бўйича ўзаро тушуниш тўғрисидаги меморандумнинг имзолангани ҳақида хабар қилинган эди. Ҳужжат мазкур соҳадаги ҳамкорликнинг келгуси икки йилликда давом эттирилишини назарда тутади.
