Қурилаётган Ангрен-Поп электрлаштирилган темирйўл линиясининг Қамчиқ довонидан ўтадиган 19 километрлик туннелнинг иккала томонидан бурғулаш ва ковлаш ишлари тугатилиб, туташтирилди. Бу ҳақда «Ўзбекистон темир йўллари» АЖ ахборот хизмати хабар қилди.

Хитойнинг China Railway Tunnel Group компанияси билан ҳамкорликда амалга оширилаётган туннель қурилиши мураккаблиги бўйича жаҳонда биринчи саккизталикдан, узунлиги бўйича ўн бешталикдан жой олган.

Айни кунда туннелда пардозлаш ишлари давом этаяпти. Бугунги кунгача туннелнинг 85 фоизида пардозлаш ишлари бажарилди. Тезда пўлат излар ётқизиш ва электрлаштириш, ҳамда коммуникация ишлари бошлаб юборилади.

Узунлиги 123,1 километрдан иборат Ангрен-Поп темир йўлининг туннелдан ташқари 104 километрида барча қурилиш ишлари 2015 йил август ойининг охирида тўлиқ тугатилган эди.