Ўзбекистон Адлия вазирлигида Бош прокуратура билан ҳамкорликда коррупцияга қарши кураш бўйича белгиланган чора-тадбирларни амалиётга жорий этиш масалаларига бағишланган идоралараро йиғилиш бўлиб ўтди.
Адлия вазирлиги ахборот хизмати хабарига кўра, йиғилишда давлат идоралари, илмий-тадқиқот муассасалари ва нодавлат ташкилотларининг раҳбарлари иштирок этдилар.
70 га яқин ташкилот вакиллари коррупцияга қарши кураш юзасидан режага кўра белгиланган чора-тадбирларнинг 2015 йилдаги ижроси ва шу йўналишдаги фаолиятнинг 2016-2017 йилларга мўлжалланган тадбирларини муҳокама қилди.
Бундан ташқари, Иқтисодий ҳамкорлик ва тараққиёт ташкилотининг коррупцияга қарши кураш бўйича Стамбул режасининг янги тавсияларини бажариш масалалари юзасидан фикр алмашилди.
