1 январь кунидан бошлаб, тадбиркорлик субектларини электр тармоқларига улаш тартиби соддалашиб, энди фақат учта тартиб-таомилдан иборат. Бу ҳақда БМТТДнинг «Ўзбекистон бизнес-форуми (3-босқич)» лойиҳаси хабар қилди.

Жаҳон банкининг «Бизнесни юритиш-2016» (Doing Business) рейтингидаги «Электр тармоқларига уланиш» кўрсаткичи бўйича Ўзбекистон 189 та мамлакат ичида 112-ўринни эгаллаган эди. Электр тармоқларига уланиш учун тадбиркор еттита босқич, хусусан лойиҳалаштириш, ишга тушириш ва созлаш ҳамда мутасадди идораларнинг рухсатини олиш билан боғлиқ бошқа тартиб-таомиллардан иборорат эди.

Вазирлар Маҳкамасининг 2 октябрь куни қабул қилинган қарорига биноан, электр тармоқларига уланиш ишларининг аксарияти энди электр қуввати билан таъминловчи ташкилотлар томонидан амалга оширилади. Ушбу ташкилотларнинг зиммасига лойиҳалаштириш, қурилиш-монтаж, режимни созлаш ва ихтисослаштирилган ташкилотларни субпудрат асосида жалб этиб, бошқа ишларни амалга ошириш билан боғлиқ вазифалар ҳам юклатилган.

Объектни электр тармоқларига улаш учун тадбиркор тегишли аризаси ва қонун томонидан тасдиқланган ҳужжатларни «ягона дарча» марказига тақдим этишининг ўзи кифоя. Ариза электр таъминоти ташкилотига йўналтиради, олинган жавоб асосида эса тадбиркор объектни электр тармоғига улаш тўғрисидаги шартномани тузиш имконига эга бўлади.

«Ўзбекистон бизнес-форуми» лойиҳаси мутахассисларининг дастлабки ҳисобига кўра, тартиб-таомиллар ва хужжатлар сони еттидан учга қисқаргани натижасида электр тармоғига уланиш муддати 86 кундан 69 кунгача қисқаради.

Янги тартиб тадбиркорлар газ таъминотига уланиши учун ҳам жорий этилиши назарда тутилган.