АҚШ давлат котиби Жон Керри октябрь охири — ноябрь бошида Марказий Осиё мамлакатлари, жумладан, Ўзбекистонга ташриф буюради. Бу ҳақда Давлат департаментининг расмий вакили Жон Кирби хабар тарқатди.
Давлат котиби Бишкек, Самарқанд, Остона, Душанбе ва Ашхободда ҳукуматнинг юқори лавозимли вакиллари билан музокара ўтказади. Бу унинг Марказий Осиёга биринчи, давлат котибининг эса Марказий Осиёнинг барча республикаларига илк сафари бўлади.
Жон Керри Қирғизистон пойтахтида Маказий Осиёдаги Америка университетининг кампуси ва АҚШ элчихонаси биноларидан бирини очади.
У Самарқандда минтақанинг беш мамлакати ташқи ишлар вазирлари учрашувида иштирок этади. Учрашув бу йил АҚШ билан Марказий Осиё мамлакатлари мулоқотининг таклиф қилинган янги С5+1" форматида ўтказилади. Вазирлар минтақа ва халқаро масалаларни муҳокама қилади.
Давлат котиби Остонада АҚШ ва Қозоғистоннинг стратегик шериклик бўйича тўртинчи учрашувида қатнашади ва Назарбоев университетида маъруза қилади.
Жон Керри Ашхобод ва Душанбеда ҳукумат вакиллари билан икки томонлама ва минтақа муаммоларини муҳокама қилади.
У Марказий Осиёга Венадаги Сурия бўйича музокарада иштирок этгандан сўнг келади.
