2017 йилга бориб, Ўзбекистонда тўқимачилик ўқув-тадқиқот технопарки қурилади. Лойиҳани «Ўзбекенгилсаноат» ва Корея Республикасининг Савдо, саноат ва энергетика вазирлиги амалга оширади.

«Ўзбекенгилсаноат» компанияси матбуот хизматидан хабар қилишларича, технопаркда Тошкент Тўқимачилик ва енгил саноати институтида (ТТЕСИ) жорий қилиш учун ўқув ва тадқиқот дастурлари ишлаб чиқилади, юқори қўшилган қиймати бор (тайёр матолар, тикув-трикотаж буюмлари) маҳсулотларни ишлаб чиқариш соҳаси мутахассислари ўқитилади, ноу-ҳау ўрганилади, материалшунослик, бўяш ва пардозлаш, мато ва кийим-кечак дизайни соҳасида тадқиқот ишлари олиб борилади, шунингдек, истиқболли технологик йўналишлар ривожлантирилади.

Лойиҳани Жанубий Корея ҳукуматининг қурилиш-монтаж ишларини бажариш, жиҳозларни сотиб олиш ва ўрнатиш, шунингдек, ходимларни ўқитишга мўлжалланган «Ривожланишга расмий ёрдам» дастурининг грант маблағлари ҳисобига молиялаштириш режалаштирилмоқда. Бугунги кунда 2015 йилда лойиҳа-смета ҳужжатларини ишлаб чиқишга корейс томонининг розилиги олинди.

Технопаркда маҳсулотларнинг янги турлари ва дизайнерлик ишланмаларини ишлаб чиқаришга татбиқ қилиш учун «Ўзбекенгилсаноат» корхоналари билан қалин ҳамкорликда ишлаши мумкин бўлган дизайн гуруҳини жойлаштириш ҳам режалаштирилмоқда.