Жанубий Корея компаниялари консорциуми Устюрт газ-кимё мажмуасини (ГКМ) қуриб битирди, дея баёнот берди Lotte Chemical (консорциум таркибига киради) президенти Ҳа Су Янг (Huh Soo-young). Жанубий Корея ОАВ унинг сўзларига таяниб ушбу хабарни тарқатди.
«Газ-кимё мажмуасининг қуриб битказилиши Корея ва Ўзбекистон ҳукуматлари ҳамда хусусий компанияларнинг қалин ҳамкорлиги натижасидир», — дея таъкидлади Ҳа Су Янг. Унинг сўзларига кўра, ГКМ 2016 йил январидан маҳсулот ишлаб чиқаришга киришади ва маҳсулотлари Марказий Осиё мамлакатлари, Россия, Европа ва Шимолий Африкага экспорт қилинади.
Устюрт ГКМ. Фото: Lotte Chemical.
2008 йил февралида «Ўзбекнафтгаз» Миллий холдинг компанияси ва Kor-Uz Gas Chemical Investment консорциуми Қорақалпоғистондаги Сурғил кони негизида Устюрт ГКМни қуриш учун тенг шериклик асосида Uz-Kor Gas Chemical ҚКни ташкил қилган эди. Корейс компаниялари консорциуми таркибига Kogas, Lotte ва STX Energy киради.
Қурилиши 2012 йилда бошланган ГКМ 4,5 млрд м3 табиий газни қайта ишлаб, 4 млрд м3 товар гази, 400 минг тонна турли зичликдаги полиэтилен, 100 минг тонна полипропилен ва 100 минг тонна пиролиз бензини ишлаб чиқаради. Кореянинг Samsung Engineering, GS Engineering ва Hyundai Engineering компаниялари лойиҳа бош пудратчилари бўлди.
4,16 млрд долларлик лойиҳа консорциумнинг чет эл молия муассасаларидан олган 2,5 млрд қарзи, Uz-Kor Gas Chemical ҚК муассисларининг 1,41 млрд долларлик маблағлари ва Ўзбекистон Тикланиш ва тараққиёт жамғармасининг 100 млн долларлик қарзи ҳисобидан молиялаштирилди.
