28 сентябрь, душанба куни Республика олимпия резервлари теннис мактабининг (РОЗТМ) очиқ кортларида аёллар ўртасида мукофот жамғармаси 250 минг АҚШ долларилик 17-халқаро Tashkent Open 2015 теннис турнири бошланди. Шунба куни бўлиб ўтган қуръа ташлаш маросимида мусобақа иштирокчилари рўйхатига киритилган бир неча қитъалик 16 жуфт кучли теннисчилар аниқланди.
26-27 сентбярь кунлари саралаш турнири бўлиб ўтди ва унда ғолиб чиққан 4 нафар ракетка устаси обрўли мусобақанинг асосий босқичига йўлланма олди.
Саралаш босқичида иштирок этган ўзбекистонлик теннисчи қизлар биринчи кун натижаларига кўра, мусобақадан чиқиб кетди. Тошкентлик Арина Фольц турнир ғолибаси бўлиши кутилаётган Марина Заневскаяга (1:6, 3:6) ютқазиб қўйди, ўтган йилги Tashkent Open турнирининг чорак финалчиси Оқгул Аманмурадова эса поляк теннисчиси Катаржина Питерни (2:6, 5:7) енга олмади.
Турнирнинг аосий қисми 28 сентябрь куни соат 10.00 да РОЗТМ бошланди. Ўйинлар томошасига кириш — бепул.
«Бу сафарги Tashkent Open иштирокчилар таркибига кўра энг кучли турнирлардан биридир, — деди унинг директори Шорунгам Утрапати. — Шунинг учун муросасиз кураш бўлиши кутилмоқда. Кутилмаган ва олдиндан башорат қилиш қийин ўйинлар кўп бўлади. Теннис ишқибозларини РОЗТМ кортларида кутиб қоламиз».
Асосий мукофотга даъвогар ўзбекистонлик икки теннисчи қиз Сабина Шарипова словакиялик Яна Цепелова билан, Нигина Абдураимова эса якшанба кунги саралаш турнири ғолибларидан бири билан куч синашади.
Турнирнинг финал ўйинлари 3 октябрь куни бўлиб ўтади. Ташкилотчилар мусобақа ўтадиган кунларда ҳаво очиқ ҳамда ғалаба учун ўйинлар шиддатли ва томошабоп бўлишини кутмоқда.
