Ўзбекистон Ички ишлар вазирлиги Тошкентнинг Амир Темур шоҳ кўчасида жойлашган 12 қаватли бизнес маркази биносида рўй берган ёнғин оқибатида қурбонлар ва жароҳат олганлар йўқлигини билдирди.

Вазирлик сайтига қўйилган хабарда айтилишича, ёнғин газ билан пайвандлаш вақтида унинг хавфсизлиги қоидаларига риоя қилинмагани сабабли келиб чиққан. Аниқланишича, бино қаватларидан бирида иситиш тизими таъмирланаётган бўлган.

Пойтахт Ёнғин хавфсизлиги бошқармасининг марказий диспетчерлик хизматига кўпқаватли бинонинг ташқи томонида ёнғин содир бўлгани ҳақидаги хабар 18 сентябрь куни 18:46 да келиб тушган. Кўрилган шошилинч чора-тадбирлар натижасида 19:33 да ёнғин қуршаб олинган ва бир соатга қолмай ўчирилган.