Жума куни кечқурун Wyndham Tashkent меҳмонхонаси ёнида жойлашган ва биринчи қаватида L'ETO Party Bar ишлаб турган 12 қаватли бизнес марказида ёнғин содир бўлди.

Гувоҳларнинг қайд этишича, бизнес марказидаги ёнғин тахминан 18:45 да пайвандлаш ишлари оқибатида келиб чиққан.

Олов бинонинг ташқи қопламасини қамраб олди ва бинонинг олд тарафи ҳамда ёнларига ёйилиб кетди. Воқеа содир бўлган жойга 10 та ўт ўчириш машинаси етиб келди, улардан бир нечтаси ёнғинни ўчиришга киришди.

Ёнғиннинг ёйилиши тахминан 19:30 да тўхтатилди.

Фавқулодда воқеа рўй берган жой ўраб олинди ва автоуловлар ҳаракати Амир Темур кўчасининг Олой бозори олдидаги қисмида вақтинча тўхтатиб қўйилди.