12 сентябрь куни Қатар пойтахти Доҳада футбол бўйича U-23 Осиё чемпионатининг финал босқичига қуръа ташланди, дейилади Футбол федерацияси тарқатган хабарда.
Қуръа натижаларига кўра, Ўзбекистон олимпия терма жамоаси С гуруҳидан жой олди. Ушбу гуруҳда миллий терма жамоага Жанубий Корея, Ироқ ва Яман терма жамоалари рақиб бўлди.
Уч йил олдин ушбу ёш тоифасида Жанубий Корея ва Ироқ футболчилари U-19 Осиё чемпионатининг финалида ўйнаган, Ўзбекистон термаси эса ярим финалгача етиб борган эди.
U-23 Осиё чемпионати қуръа натижалари қуйидагича бўлди:
А гуруҳи: Қатар, Сурия, Эрон, Хитой;
B гуруҳи: Саудия Арабистони, Япония, КХДР, Таиланд;
C гуруҳи: Ироқ, Жанубий Корея, Ўзбекистон, Яман;
D гуруҳи: Иордания, Австралия, БАА, Вьетнам.
U-23 Осиё чемпионати 2016 йилнинг 12-30 январь кунлари Қатарда бўлиб ўтади. Энг яхши учта терма жамоа Рио-де-Жанейрода бўлиб ўтадиган Олимпия ўйинларида иштирок этиш ҳуқуқини қўлга киритади.