18-20 сентябрь кунлари Тошкентдаги Республика олимпия захиралари коллежи теннис мактаби кортида Ўзбекистон билан АҚШ терма жамоалари ўртасидаги Дэвис Кубоги ўйини бўлиб ўтади, деб хабар тарқатди Теннис федерацияси матбуот хизмати.
Ушбу беллашув Ўзбекистон термаси учун жамоалар ўртасидаги жаҳон чемпионатининг олий лигасига чиқиш йўлида саккизинчи уриниш бўлади. Ўзбек теннисчиларига икки марта: 1998 ва 2014 йилларда автралияликлар қарши турган бўлса, қолган йилларда улар Чехия (1999), Нидерландия (2000), Сербия (2009), Испания (2001) ва Қозоғистон (2012) терма жамоаларини енга олмаган эди. Шу билан бирга, ўзбекистонлик теннисчилар худди шунча марта Осиё ва Океания зонаси биринчи гуруҳининг турнир жадвалида етакчилик қилган эди.
Мамлакат терма жамоасининг Пётр Лебедь сардорлигидаги таркиби ўзгармади. Унга Денис Истомин етакчилик қилмоқда, Фаррух Дўстов эса жамоага фаол кўмаклашмоқда. Кортга ёш теннисчилар — 20 яшар Темур Исмоилов ва 21 яшар Санжар Файзиев чиқишга ҳозирлик кўрмоқда.
Дэвис Кубоги жаҳон лигасининг биринчи турида Буюк Британияга ютқазган АҚШ спортчилари энди дунё теннисининг сара жамоалари орасидаги ўрнини сақлаб қолиш учун ўзбекистонликлар билан беллашади.
Жамоа сардори, машҳур Жим Курье ўйинчилар таркибини ўзгартирди. Биринчи ракетка ҳисобланган Жон Изнер ўрнига ҳам яккалик, ҳам жуфтлик баҳсларида бирдай яхши ўйнайдиган Жэк Сок кортга чиқади. У якка баҳсларда кучли теннисчилар рейтингида 28-ўринни, жуфтлик баҳсларида эса 24-ўринни эгаллаб турибди.
23 яшар Жек Сок АҚШ термасининг энг ёш ўйинчиси бўлиб, жамоа таркибида илк марта ўйнайди. Жаҳон рейтингида 27-ўринни банд этган Стив Жонсон ҳам биринчи марта терма жамоа сафига киритилди. Мос равишда 38- ва 68-ўринларни эгаллаб турган Сэм Куэрри ва Дональд Янг термадаги ўринларини сақлаб қолди. Дональд Янг иккита якка беллашувда ҳам британияликларга ютқазиб қўйган эди. Таркибда эгизак Брайнларнинг йўқлиги кутилмаган ҳол бўлди. Баҳор фаслида Майк ва Боб жуфтликларнинг дунё рейтингининг биринчи поғонасини эгаллаб турган эди.
