Тошкентда 7-10 сентябрь кунлари бўлиб ўтган Хитой киноси кунлари доирасида ХХРдан ташриф буюрган ушбу мамлакат делегацияси вакиллари «Ўзбеккино» Миллий агентлиги раҳбарияти ва таниқли ўзбек киноижодкорлари билан учрашди, деб хабар беради «Ўзбеккино» матбуот хизмати

Учрашув чоғида икки мамлакат ўртасида фильмлар алмашинувини ташкил этиш, Ўзбекистон ва Хитой киноижодкорларини жалб этган ҳолда қўшма фильмлар суратга олиш, мультипликация соҳасида ҳамкорлик қилиш, ўзаро тажриба алмашинувини йўлга қўйиш, шунингдек, Хитойда Ўзбекистон киноси кунларини ўтказиш ва Хитойдаги нуфузли халқаро кинофестивалларда ўзбек фильмларининг иштироки учун шарт-шароит яратиш каби масалалар муҳокама қилинди, дейилади хабарда.

Делегация раҳбари, ХХР Матбуот, нашр ишлари, радио, кинематография ва телевидение давлат маъмурияти бош директори ўринбосари Луан Гуожи Хитой томони Ўзбекистон билан кинематография соҳасидаги ҳамкорликни турли йўналишларда ривожлантиришга тайёр эканини билдирди.

Унинг таъкидлашича, 2016 йилнинг апрель ойида Хитойда Ўзбекистон киноси кунларини юқори савияда ўтказиш, 2015 йилнинг октябрь ойида эса Хитойда ўтказилиши режалаштирилган «Буюк ипак йўли» халқаро кинофестивалига ўзбекистонлик ижодкорлар тасвирга олинган фильмларни тавсия этиш имконияти мавжуд.