Ўзбекистон Иқтисодиёт вазирлигининг «Технологиялар трансфери агентлиги» давлат корхонаси тугатилади. Бу Вазирлар Маҳкамасининг 28 августда қабул қилинган қарорида кўзда тутилган.
Технологиялар трансфери агентлиги 2008 йилда Фан ва технологияларни ривожлантиришни мувофиқлаштириш қўмитаси таркибидан чиқарилиб, Иқтисодиёт вазирлигига бўйсундирилган эди.
Инновацион лойиҳаларни ишлаб чиқиш ва уларни ишлаб чиқаришга жорий этиш, инновацион технологияларни, шу жумладан, хорижий инновацион технологияларни мустақил экспертизадан ўтказиш, мослаштириш ва мамлакат амалиётига жорий этиш, илмий-техник ишланмаларни (ИТИ) тижорат сотуви объекти сифатида ишлаб чиқаришга жорий этиш лойиҳаларини тузиш ва амалга ошириш, шунингдек, ИТИ натижаларини тижоратлаштириш соҳасида халқаро илмий-техник ҳамкорликни амалга ошириш агентликнинг асосий фаолият турлари қилиб белгиланган эди.
Ҳукумат қарорига кўра, Иқтисодиёт вазирлиги марказий аппарати ходимларнинг энг кўп миқдори (150 дан 176 гача) ва вазир ўринбосарлари сони (вазирнинг биринчи ўринбосарини ҳисобга олмаганда 3 нафардан 4 нафаргача) ҳам оширилди.
