Жаҳон чемпионати-2018 иккинчи саралаш босқичи "H" гуруҳи 3-тури доирасида Ўзбекистон миллий терма жамоаси Яманга қарши майдонга тушиб, 1:0 ҳисобида ғалаба қозонди, деб хабар қилди Футбол федерациси матбуот хизмати.
3 сентябрь куни «Пахтакор» марказий стадионида бўлиб ўтган учрашув Самвел Бабаян учун миллий терма жамоа бошқарувидаги илк ўйин бўлди.
Мусобақадаги ягона тўпни Александр Гейнрих урди. Иккинчи бўлимнинг бошидан ўйинга тушган Гейнрих 51-дақиқада жарима тўпини тепиб, гол киритди ва ЖЧнинг жорий саралаш босқичида Ўзбекистон жамоасига илк 3 очкони келтирди.
Ўзбек футболчилари кейинги учрашувни 8 сентябрь куни Филиппин пойтахти Манилада ушбу мамлакат терма жамоасига қарши ўтказади. Айни пайтда филиппинликлар икки учрашувдан сўнг 6 та очко жамғаришга муваффақ бўлди.
