Хитойнинг Poly Technologies ва «Ўзкимёсанот» компаниялари Тошкент вилоятида шина заводи қуришга киришди. «Ангрен» махсус индустриал зонасида конвейер лентаси, автомобиль ва қишлоқ хўжалик техникаси шиналари ишлаб чиқариш заводи қуришни бошлаш маросими 28 августда бўлиб ўтди.

Қиймати 184 млн долларлик лойиҳада Ангрендаги «Резинотехника» ОАЖ ўрнида технологик қуввати йилига 3 миллион дона автомобиль, 200 мингта қишлоқ хўжалик техникаси шиналари ва 100 минг погон метр конвейер ленталари ишлаб чиқарадиган технология қувватини қуриб, ишга тушириш мўлжалланмоқда.

Poly Technologies заводнинг технологик қисмини тўлиқ қуриб битказиш бўйича пудратчи бўлади. Қурилиш муддати — 34 ой. Лойиҳа «Ўзкимёсанот»нинг ўз маблағлари, Хитой Эксимбанки ва Ўзбекистон тикланиш ва тараққиёт жамғармаси кредитлари ҳисобидан амалга оширилади.

Ўзбекистон шиналар ишлаб чиқармайди, улар МДҲ мамлакатлари, хусусан, Россия, шунингдек, Хитойдан тўлиқ импорт қилинади.

«Резинотехника» заводи СССР тарқаб кетишидан олдин республикадаги энг йирик резинотехника маҳсулотлари ишлаб чиқарувчи корхона эди. Унинг лойиҳа қуввати енгил автомобиль ва автотиркамалар учун 120 мингта шина (профиль 41/21), 9 миллион жуфт махсус резина пойабзал, 600 минг мрезина қўшилган мато ва 1000 тонна товар резинаси ишлаб чиқаришдан иборат эди. Россиядан сотиб олинадиган хомашё кескин камайиб кетгани сабабли корхона сўнгги йилларда 5 фоиздан кам қувват билан ишлаётган эди.

«Ўзкмиёсаноат» мутахассисларининг фикрича, ушбу истиқболли лойиҳа бир вақтлар мамлакат кимё саноатининг энг йирик корхоналаридан бирига қайта ҳаёт бағишлабгина қолмасдан, автомобиль саноатининг маҳаллийлашиш даражасини ошириш имконини беради.