Жорий йилнинг иккинчи чорак якунларига кўра, Universal Mobile Systems Ўзбекистон-Россия мобил алоқа операторининг абонентлар базаси 643,1 минг кишига етди. Бу ҳақда МТС компаниясининг (операторнинг Россия тарафидан муассиси) 18 августда эълон қилинган ҳисоботида сўз юритилади.

UMS тармоғи ўтган йилнинг 1 декабридан ишга туширилган эди. Апрель-июнь ойларида операторга уланишлар миқдори 51,8 фоиз ўсди. Биринчи чорак якунларига кўра, компаниянинг 423,6 минг, йил бошида эса 188,1 минг абоненти бор эди.

МТСнинг UMS низом жамғармасидаги улуши 50,01 фоиздир, қолган 49,99 фоиз улуш эса «Радиоалоқа, радиоэшиттириш ва телевидение маркази» ДУКга тегишли.

МТСнинг ўзи фаолият кўрсатаётган олтита мамлакатдаги абонентлари сони ярим йиллик якунлари бўйича 105,3 миллион фойдаланувчидан иборат бўлди.