Jahon

4 aprel 2022, 13:16

19 yoshli Oliviya Rodrigodan 44 yoshli Kane Uestgacha — Gremmi-2022 g‘oliblari e’lon qilindi

Las-Vegasda Gremmi musiqiy premiyasining 64-taqdirlash marosimi bo‘lib o‘tdi. Bruno Mars va Anderson Pakning «Leave The Door Open» kompozitsiyasi «Yil qo‘shig‘i» deb e’tirof etildi. «Yil albomi» bo‘yicha g‘oliblikni Djon Batist qo‘lga kiritdi. G‘oliblar orasidan 19 yoshli Oliviya Rodrigo va kambek qilgan Kane Uest ham o‘rin olgan. Qolaversa, marosimga videomurojaat yo‘llagan Ukraina prezidenti Vladimir Zelenskiy san’atkorlardan jimlikni musiqa bilan to‘ldirishni so‘radi.

4 aprel 2022, 13:08

Aleksandr Vuchich ikkinchi muddatga Serbiya prezidenti etib saylandi

Aleksandr Vuchich Serbiya prezidentligi saylovida g‘alaba qozonganini e’lon qildi. U saylovchilarning kamida 60 foizlik ovozini to‘pladi. Shuningdek, Vengriyada ham parlament saylovlari bo‘lib o‘tdi. Unda amaldagi bosh vazir Viktor Orban boshchiligidagi koalitsiya g‘olib bo‘ldi.

4 aprel 2022, 11:06

Pokiston bosh vaziri Imron Xon lavozimidan ozod etildi

Pokiston prezidenti Orif Alviy bosh vazir Imron Xon taklifiga binoan mamlakat parlamentini tarqatib yuborgandi. Shundan so‘ng, bosh vazirning o‘zi ham lavozimidan ozod qilindi. Imron Xon muvaqqat bosh vazir tayinlangunga qadar mazkur lavozimda qoladi. Mamlakatda parlament saylovlari 90 kundan so‘ng o‘tkazilishi kutilmoqda.

4 aprel 2022, 10:46

«Tolibon» butun Afg‘oniston hududida ko‘knori yetishtirishni taqiqladi

«Tolibon» harakati butun Afg‘oniston bo‘ylab fermerlarga ko‘knori yetishtirishni taqiqladi. Aniqlangan hosillar yo‘q qilinadi, qoidabuzarlar esa shariat qonunlariga asosan jazolanadi.

3 aprel 2022, 17:15

Qozog‘istonda prezidentga suiqasd uyushtirmoqchi bo‘lgan xorijiy razvedka agenti qo‘lga olindi

Nur-Sulton shahrida Qozog‘iston Milliy xavfsizlik qo‘mitasi (KNB) kontrrazvedkasi mamlakat prezidentiga suiqasd uyushtirishni rejalashtirayotganlikda gumon qilingan «xorijiy razvedka agenti»ni qo‘lga oldi. Shuningdek, ushbu agent Qozog‘istonda Rossiyaga qarshi tashviqot olib borish va jamiyatda rusofobik qarashlarni shakllantirish vazifalarini olgani ma’lum qilindi.

3 aprel 2022, 01:48

«Biz Qrimni va Donbasni tan olmaymiz, chunki BMT ularni tan olmaydi» — Qozog‘iston prezidenti administratsiyasi rahbari o‘rinbosari

Qozog‘iston Ukrainaning hududiy yaxlitligini hurmat qiladi, deya ma’lum qildi Qozog‘iston PA rahbarining birinchi o‘rinbosari Timur Suleymenov. Uning qayd etishicha, Qozog‘iston ziddiyatda qaysidir tarafni «na harbiy, na siyosiy jihatdan qo‘llab-quvvatlamaydi», biroq Ukrainaga insonparvarlik yordamini ko‘rsatadi. Shu bilan birga, Qozog‘iston Rossiyaga qarshi sanksiyalarni chetlab o‘tish uchun vosita bo‘lmaydi hamda Rossiya va Belarusga qo‘yilgan cheklovlarga rioya qiladi.

2 aprel 2022, 14:43

Ukrainada 1276 nafar tinch aholi halok bo‘ldi — BMT

24 fevraldan 1 aprelga qadar Ukrainadagi urush oqibatida 1276 nafar tinch aholi halok bo‘ldi, yana 1981 kishi yaralandi. Bu BMT tomonidan tasdiqlangan raqamlar, asl holat bundanda ko‘proq bo‘lishi mumkin. Ukraina bosh prokurori juma kuni soat 8:00 holatiga jami 153 nafar bola halok bo‘lgani va 245 nafar bola jarohat olganini qayd etdi.

2 aprel 2022, 12:58

Forbes: Fransiya Alisher Usmonovga aloqador ikkita vertolyotni hibsga oldi

Fransiya hukumati sanksiyalar ostida bo‘lgan milliarder Alisher Usmonov bilan bog‘liq bo‘lgan ikkita vertolyotning foydalanish huquqini muzlatib qo‘ydi, deb xabar qildi Forbes. Ularning narxi 26 mln dollarga baholanmoqda. Tadbirkorning vakili Usmonov o‘z mulkining katta qismini, shu jumladan ushbu vertolyotlarni qaytarib bo‘lmaydigan trastlarga berib yuborganini ma’lum qildi.

1 aprel 2022, 11:53

Foto: Quyoshning insoniyat tarixidagi eng yaqin tasvirlari e’lon qilindi

ESA va NASA hamkorligida amalga oshirilayotgan missiya — Solar Orbiter avtomatik kosmik apparati quyoshning kuzatuvlar tarixidagi eng yaqin tasvirlarini taqdim etdi. Suratlar quyosh orbitasidan taxminan 75 mln km uzoqlikda, ya’ni qurilma Yer sayyorasi va Quyosh o‘rtasidagi masofaga yetganida olingan.

30 mart 2022, 23:22

Italiyada Alisher Usmonovning mol-mulki musodara qilindi

Italiyaning Sardiniya orolida rossiyalik oligarx Alisher Usmonovning mol-mulklari musodara qilindi. Jumladan, tadbirkor 17 mln yevrolik villasi va 66 mln yevrolik aktivlari bo‘lgan oltita kompaniyasidan ayrilgan. Shunindek, pulemyot va qo‘l granatalari hujumlariga bardoshli qiymati 600 ming dollardan ziyod Mercedes Maybach S650 Guard VR10 avtomobili ham olib qo‘yilgani aytilmoqda.

29 mart 2022, 19:16

Rossiya Kiyev va Chernigov yo‘nalishlarida harbiy faolligini keskin qisqartiradi. Turkiyada bo‘lib o‘tgan Rossiya-Ukraina muzokaralari natijasi

Istanbulda Rossiya va Ukraina delegatsiyalari o‘rtasida navbatdagi muzokaralar bo‘lib o‘tdi. Ukraina xalqaro xavfsizlik kafolatlari masalasida o‘z takliflarini taqdim etdi. Unga ko‘ra, Rossiya Ukrainani Yevropa Ittifoqiga qo‘shilishiga qarshilik qilmaydi, mamlakat xavfsizligi BMT Xavfsizlik kengashining doimiy a’zolari tomonidan kafolatlanadi. Ayni vaqtda Kiyev harbiy ittifoqlarga qo‘shilishdan bosh tortishga va’da berdi. Rossiya esa Kiyev va Chernigov yo‘nalishlarida harbiy faollik keskin qisqartirilishini ma’lum qildi.

29 mart 2022, 11:54

Ukrainaning urush natijasidagi iqtisodiy yo‘qotishlari 564,9 mlrd dollarga yetgani aytildi

Ukrainadagi urush natijasida bir martalik iqtisodiy yo‘qotishlar qiymati 564,9 mlrd dollarga yetdi, deya ma’lum qildi Ukraina iqtisodiyot vaziri. U «raqamlar o‘sishda davom etishini» ta’kidladi. Shuningdek, Xalqaro valyuta jamg‘armasining dastlabki hisob-kitoblariga ko‘ra, urush natijasida Ukraina iqtisodiyotining 35 foizga pasayishi kutilmoqda.

29 mart 2022, 10:25

Ukrainadagi urush kambag‘al mamlakatlarda oziq-ovqat tanqisligiga olib kelishi mumkin — JST rahbari

JST bosh direktori Ngozi Okonjo-Iveala Rossiyaning Ukrainadagi harbiy operatsiyasi oziq-ovqat narxlari va ochlikka sezilarli darajada ta’sir qilishini ta’kidladi. U Afrikaning ko‘plab mamlakatlari Qora dengiz mintaqasidan keladigan oziq-ovqat ta’minotiga bog‘lanib qolganini qayd etdi. Rossiya va Ukraina butun dunyo bug‘doy ta’minotining 24 foizini, kungaboqar yog‘i va kunjara eksportining taxminan 80 foizini tashkil qilishadi.

28 mart 2022, 10:24

«Oskar-2022» mukofoti g‘oliblari e’lon qilindi

AQShda «Oskar» mukofotining 94-marosimida Uill Smitt eng yaxshi aktyor, Jessika Chesteyn esa yilning eng yaxshi aktrisasi deb e’lon qilindi. Eng yaxshi badiiy film nominatsiyasida CODA e’tirof etildi. «Dyuna» filmi 6 ta «Oskar» sohibi bo‘ldi.

26 mart 2022, 17:11

O‘zbekistonlik harbiylar AQShda o‘tgan harbiy musobaqada g‘olib bo‘ldi

O‘zbekiston Mudofaa vazirligi harbiylari Abdurasul Tuyg‘unov va Abdumalik Abdurahmonov AQShning Missisipi shtatida bo‘lib o‘tgan «Eng ilg‘or jangchi-2022» musobaqasida g‘olib bo‘ldi. Ular AQSh Milliy gvardiyasining Maxsus bo‘linmalari harbiy xizmatchilari bilan fitnes test, 15 kg yuk bilan 20 kmga marsh yugurish, artilleriya olovini boshqarish, o‘qotar qurollarni yoyish va yig‘ish, o‘q otish hamda kutilmagan mashqlar doirasida o‘zaro kuch sinashdi.

25 mart 2022, 20:32

Rossiya Ukrainadagi urushda 1351 nafar harbiylari halok bo‘lganini ma’lum qildi

Rossiya Mudofaa vazirligi Ukrainadagi «maxsus operatsiya» davomida 1351 nafar harbiy xizmatchisi halok bo‘lganligini, 3825 nafari esa yaralanganini ma’lum qildi. Vazirlik harbiy operatsiyaning birinchi bosqichi asosiy vazifalari amalga oshirilganini aytdi. Ukraina va NATO Rossiya qo‘shinlarining yo‘qotishlari bundan bir necha barobar ko‘p bo‘lganligini aytmoqda.

25 mart 2022, 10:45

BMT Bosh Assambleyasi Ukrainaga qarshi tajovuzning gumanitar oqibatlari to‘g‘risidagi rezolyutsiyani qabul qildi

BMT Bosh Assambleyasi «Ukrainaga qarshi tajovuzning gumanitar oqibatlari» rezolyutsiyasini qabul qildi. Uni 140 davlat qo‘llab-quvvatladi, Rossiya va 4 davlat qarshi chiqdi. 38 davlat, jumladan O‘zbekiston betaraf qoldi. Rezolyutsiyada Rossiyadan harbiy harakatlarni zudlik bilan to‘xtatish, fuqaro obyektlari va aholiga hujum qilmaslik, shaharlar blokadasini to‘xtatish talab qilinadi.

24 mart 2022, 18:05

Afg‘onistonda 6-sinfdan yuqori o‘quvchi qizlarning maktabga qaytishiga ruxsat berilmadi

Afg‘onistondagi maktablar 23 mart kuni barcha o‘quvchilar — ham o‘g‘il, ham qiz bolalar uchun ochilishi kerak edi, biroq o‘qish boshlangan kuni 6-sinfdan katta o‘quvchi qizlarlarga darsga kirishga ruxsat berilmadi yoki dars boshlanganidan bir necha soat o‘tib ketish buyrug‘i berildi. «De-fakto hokimiyatning layoqatsizligi, ularning bir necha bor va’da berishiga qaramasdan, 6-sinfdan kattaroq qizlar uchun maktablar qayta ochilmasligi chuqur umidsizlikka tushirdi. Bu Afg‘onistonga jiddiy zarar yetkazadi», — dedi BMT Bosh kotibi.

24 mart 2022, 15:00

Finalissima: 1-iyunda Italiya va Argentina terma jamoalari superkubok uchun o‘ynaydi

1 iyun kuni futbol bo‘yicha Yevropa va Janubiy Amerika qit’alari chempionlari o‘rtasida superkubok o‘yini o‘tkaziladi. Italiya va Argentina terma jamoalari o‘rtasidagi uchrashuv Londonning Uembli stadionida bo‘lib o‘tadi.

24 mart 2022, 11:17

Yevropaning Rossiya neft va gaziga taqiq qo‘yishi Ukrainadagi urushni to‘xtatishi mumkin — iqtisodchilar

Iqtisodchilar Sergey Guriyev va Oleg Isxoki Yevropa Rossiya neft va gazi importiga nisbatan ta’qiq kiritishi qanday qilib Ukrainadagi urushni to‘xtatishi mumkinligi haqidagi fikrlari bilan bo‘lishdi. Ularga ko‘ra, ushbu sanksiyalar Kremlni harbiy harakatlarni davom ettirishga ko‘maklashuvchi mablag‘lardan mahrum qilishi mumkin.


"Gazeta.uz"da ro`yxatdan o`tish

Qo`shimcha imkoniyatlarga ega bulish uchun saytda ro`yxatdan o`ting