O‘zbekiston Energetika vazirligining ishchi guruhi So‘x tumanidagi yerosti gaz saqlash inshootini tiklash loyihasi doirasida Qirg‘izistonning Qadamjoy tumanida bo‘ldi.
Shavkat Mirziyoyev bir vaqtlar yopilgan, hajmi 2,5−3 mlrd kub metr bo‘lgan Shimoliy So‘x yerosti gaz saqlash inshooti yana qayta ishga tushishini ma’lum qildi. Inshootning asosiy gaz saqlash qismi Qirg‘izistonda, kompressorlar esa O‘zbekiston hududida. Inshootdan umumiy foydalanish borasida muzokaralar olib boriladi.
Farg‘ona viloyatidagi Rishton va So‘x tumanini bog‘lab turuvchi Qirg‘iziston orqali o‘tgan yo‘lning ochilishi rejalashtirilmoqda. Ushbu yo‘nalishdagi chegara nazorat-o‘tkazish punktlari tayyor holatga keltirildi.
Qirg‘iziston prezidenti matbuot kotibining xabar berishicha, Qirg‘iziston O‘zbekistonda joylashgan anklav hudud — So‘x bilan aviaqatnovlar va transport qatnovlarini yo‘lga qo‘yishga, O‘zbekiston esa shu paytgacha «chegara hududlar aholisi o‘rtasida tortishuvlar va siyosiy ziddiyatlarga sabab bo‘lib kelgan» Unkar-Too hududini berish tayyor ekanligini ma’lum qildi.
14 dekabr kuni Farg‘ona viloyat sudida So‘x voqealari yuzasidan sud jarayonida 5 nafar sudlanuvchi so‘roq qilindi. Ular tergov jarayonida qiynoqqa solinganligini, ba’zilari esa to‘polonlarda qatnashmaganligini ta’kidladi. B.Shodiyev tergov paytida boshiga qop kiygizib, beldan pastki qismiga urishganini aytdi. Sudlanuvchi Sh. Olimov ayblov varaqasiga qo‘l qo‘yib bermasa, «podvalga tushasan» deb qo‘rqitishganini ta’kidladi.
Farg‘ona viloyati prokuraturasi vakili bloger Haydarjon Boboxaydarovning boshiga qop kiydirib, So‘xdan Farg‘onaga olib kelinganligi haqidagi ma’lumotni rad etdi. Advokat uni hibsda gumon qilinuvchi sifatida ushlab turish uchun faktlar yetarli emasligini aytdi.
Bosh prokuratura Xaydarjon Boboxaydarov (bloger Dadaxon Haydarov) So‘x tumanida sodir bo‘lgan ommaviy tartibsizliklar holati yuzasida gumon qilinuvchi tariqasida jalb qilinganini ma’lum qildi. Uning oilasi 22 avgustdan buyon uning qayerdaligini bilmasligini aytdi.
Iyun oyida bo‘lib o‘tgan bosh vazir bilan uchrashuvda hokimni o‘zgartirishni so‘ragan so‘xlik bloger Dadaxon Haydarov 10 sutkaga qamoqqa olingan. Otasining so‘zlariga ko‘ra, uni boshiga qop kiygizgan holda vertolyotda olib ketishgan. Yaqinlari 22 avgustdan buyon uning qayerda ekanligidan bexabar. «Gazeta.uz» manbasiga ko‘ra, huquqni muhofaza qilish organlariga 80−90 odam olib borilgan.
Bosh prokuratura 31 may kuni So‘x tumanidagi «Chashma» bulog‘i bo‘yida Qirg‘iziston va O‘zbekiston fuqarolari o‘rtasida buloqdan foydalanish yuzasidan kelib chiqqan nizo bo‘yicha jinoyat ishi qo‘zg‘atilib, 6 kishi qamoqqa olinganini ma’lum qildi. Hozirda tergov harakatlari olib borilmoqda.
Bosh vazir Abdulla Aripov So‘x tumanida samolyot va vertolyotlar uchun uchish-qo‘nish maydonchasi tashkil etilishini ma’lum qildi. Farg‘ona-So‘x yo‘nalishidagi aviaqatnovlarga «Humo AIR» aviakompaniyasining An-2 samolyoti hamda «Uzbekistan Helicopters» MCHJga qarashli MI-8 vertolyotlarini jalb qilish ko‘zda tutilmoqda.
Qo‘shimcha imkoniyatlarga ega bulish uchun saytda ro‘yxatdan o‘ting