Yangiliklar

18 may 2022, 11:59

Nukusda 2 kg geroinni 90 ming dollarga sotayotgan shaxs ushlandi

Nukusda 34 yoshli shaxs 2 kgdan ziyod geroinni 90 ming dollarga sotayotganda ushlandi. Shuningdek, Toshkent shahri, Farg‘ona va Namangan viloyatlarida ham giyohvandlik va psixotrop moddalar bilan bog‘liq holatlar aniqlandi.

18 may 2022, 10:54

OTMga qabul uchun davlat buyurtmasini kamaytirish taklif etilmoqda

2022/2023 o‘quv yili uchun OTMlarga qabul kvotalarini belgilashga oid prezident qarori loyihasi jamoatchilik muhokamasiga qo‘yildi. Unga ko‘ra, davlat buyurtmasi sonini kamaytirish taklif etilmoqda. Xususan, bakalavrlarni tayyorlash uchun 110 278 nafar (2021 yilda — 157 755), magistrlarni tayyorlash uchun 11 082 nafar (2021 yilda — 12 900) talabaga o‘rin ajratish ko‘zda tutilmoqda. Moliyaviy mustaqillik berilgan 35 ta OTM esa to‘lov-kontrakt asosidagi kvotani o‘zi belgilaydi.

18 may 2022, 10:45

Qozog‘istonda konstitutsiyaga o‘zgartirishlar kiritish bo‘yicha referendumga hozirlik ko‘rilmoqda

5 iyun kuni Qozog‘istonda mamlakat konstitutsiyasiga o‘zgartirishlar kiritish bo‘yicha referendum bo‘lib o‘tadi. Tuzatishlarda prezidentning yaqin qarindoshlariga siyosiy davlat xizmatchisi lavozimlarini egallashni taqiqlash, Qozog‘istonning birinchi prezidenti belgilagan tamoyillarning o‘zgarmasligi haqidagi qoidalarni istisno qilish va boshqalar taklif qilingan.

18 may 2022, 10:22

Tibbiyot xodimlarining oylik maoshi oshiriladi

Prezident farmoni bilan 1 iyundan boshlab davlat tibbiyot muassasalaridagi tibbiyot, farmatsevtika va boshqa xodimlarining oylik lavozim maoshlari oshiriladi. Bir qancha ustamalar ham joriy etiladi. 1 sentabrdan boshlab tibbiy-profilaktika muassasalari xodimlari ilmiy daraja uchun maoshining 30 foizidan 60 foizigacha qo‘shimcha oylik oladi.

18 may 2022, 10:13

Mastlik holatida bo‘lganlarga tibbiy yordam ko‘rsatish punktlari tashkil etiladi

O‘zbekistonning barcha hududlarida mast holatda bo‘lgan shaxslarga kamida 10 o‘rinli tibbiy yordam ko‘rsatish punktlari tashkil etiladi. Shuningdek, ichki ishlar organlariga narkologik kasalliklarga chalinganlarni majburiy davolashga yuborish huquqi berilmoqda. Qolaversa, yil oxirigacha narkologiya dispanserlarida qo‘shimcha 430 ta o‘rin yaratiladi.

18 may 2022, 10:06

«Mo‘ynoq qo‘ltig‘i»dagi qamishzorlarda yong‘in chiqdi

Qoraqalpog‘istonning Mo‘ynoq tumani «Mo‘ynoq qo‘ltig‘i»dagi qamishzorlarda yong‘in yuz berdi. Qoraqalpog‘iston Ekologiya qo‘mitasi yong‘inni o‘chirish imkoni yo‘qligini, chunki qamishzorlar bo‘yi suv va botqoqlikdan iboratligini aytmoqda. Yong‘indan jarohatlangan va halok bo‘lganlar yo‘q.

17 may 2022, 22:00

17 may kuni O‘zbekistonda sodir bo‘lgan eng muhim xabarlar dayjesti

Birja nimaligini bilmaydigan tuman hokimlari ham borligini tanqid qilgan Shavkat Mirziyoyev, 700 dan ortiq Nest One quruvchisiga maosh vaqtida to‘lanmagani, O‘zbekistonda boshlangan mahalla raislari saylovi, Markaziy Osiyoda iqlim o‘zgarishini 2 barobarga tezlashtirgan Orol fojiasi va boshqalar — «Gazeta.uz»ning 17 maydagi eng muhim xabarlari dayjestida.

17 may 2022, 18:55

700 dan ortiq Nest One quruvchisiga maosh vaqtida to‘lanmagan — Mehnat inspeksiyasi

Toshkent shahar Davlat mehnat inspeksiyasi Nest One binosini qurayotgan «Ozguvn mimarlik inshaat» va «Ozguven tasarim mimarlik insaat sanayi ve ticar» kompaniyalari jami 739 nafar ishchiga maoshini o‘z vaqtida bermaganini aniqladi. Avvalroq quruvchilar namoyish o‘tkazib, avtomobil yo‘lini to‘sib qo‘ygandi. Seshanba kuni 2,3 mlrd so‘mdan ortiq ish haqi to‘lab berilishiga erishildi va inspeksiya har ikkala kompaniya rahbari Guven Mehmetraga yozma ko‘rsatma kiritdi.

17 may 2022, 18:44

«Birja nimaligini bilmaydigan tuman hokimlari ham bor» — Shavkat Mirziyoyev

Birja savdolarni ko‘paytirish bo‘yicha o‘tkazilgan yig‘ilishda davlat rahbari Jomboy va Uychi tumanlarida birja orqali g‘isht hamda beton qorishmasini sotgan korxonalarni e’tirof etib, hokimlar tomonidan bu tajriba yaxshi yo‘lga qo‘yilmaganini tanqid qildi. «Ochiq aytish kerak, hali aksariyat hokimlar masalaning ichiga kirmagan, birja nimaligini bilmaydigan tuman hokimlari ham bor», — dedi u. Prezident yil oxirigacha o‘z mahsulotlarini birjalarga olib chiqadigan tadbirkorlar sonini 2 baravarga, mahsulotlar turini esa 5 baravarga oshirishni topshirdi.

17 may 2022, 17:57

Iroqdagi chang bo‘roni sababli maktab, aeroport va hukumat idoralari yopildi

16 may kuni Iroq poytaxti Bag‘dod va bir qator viloyatlarni so‘nggi bir oydagi sakkizinchi chang-qum bo‘roni qopladi. Rasmiylar maktablar, aeroportlar va davlat idoralarini yopib qo‘ydi, minglab kishilar nafas qisishi shikoyati bilan kasalxonalarga murojaat qilishdi.

17 may 2022, 17:43

«Qoradori-2022»: Qamashida 50 tup kannabis yetishtirayotgan shaxs ushlandi

Samarqandlik fuqaro Qashqadaryoning Qamashi tumanida ijaradagi uyida 50 tup kannabis yetishtirayotgani aniqlandi.

17 may 2022, 17:43

Toshkentdagi Mehribonlik uyida sodir etilgan o‘g‘rilik va huquqbuzarlik yuzasidan jinoyat ishi qo‘zg‘atildi

Prokuratura Toshkent shahridagi 21-sonli Mehribonlik uyi faoliyatini tekshirgandan so‘ng, jinoyat ishi qo‘zg‘atdi. Aprel oyida muassasa tarbiyalanuvchilari xodimlarning biridan norozi bo‘lib, namoyish uyushtirgandi. Prokuratura bir qator qonunbuzarliklar, jumladan, mablag‘larni o‘zlashtirish holatlarini aniqladi. Mehribonlik uyi direktori bilan tuzilgan mehnat shartnomasi bekor qilindi.

17 may 2022, 17:28

O‘zbekistonda mahalla raislari saylovi boshlandi

O‘zbekistonda fuqarolar yig‘inlari raislari (oqsoqollari) saylovi boshlandi. Mamlakatda 9349 ta fuqarolar yig‘inlari mavjud. Nomzodlar 26,9 ming kishini tashkil etadi (har bir o‘ringa deyarli 3 nomzod). Birinchi kunda 834 nafar rais saylangan bo‘lib, ularning 52 foizi ushbu lavozimga qayta saylangan.

17 may 2022, 16:38

«Qo‘lingizga Konstitutsiyani oling va o‘qing: qaysi modda nima uchun o‘zgarishi kerak?»

O‘zLiDeP va «Milliy tiklanish» partiyalari Konstitutsiyaga o‘zgartirishlar kiritish to‘g‘risidagi masalani parlamentning ikki palatasi kengashlari muhokamasiga kiritish to‘g‘risidagi qarorni qabul qildi. O‘zLiDeP rahbari Aktam Xaitov takliflarda xalqning orzu-istaklari mujassam ekanligini ta’kidladi. «Milliy tiklanish» yetakchisi Alisher Qodirov esa barcha fuqarolarni taklif bildirishga chaqirdi. Deputatlar prezident avvalroq bildirib o‘tgan takliflarni takrorlamoqda.

17 may 2022, 16:18

Nest One quruvchilari oylik kechikkani sababli chorrahani to‘sib qo‘ydi

Ijtimoiy tarmoqlarda Nest One binosining o‘nlab quruvchilari yo‘lni to‘sib qo‘ygani haqida xabarlar tarqaldi. Murad Buildings kompaniyasi «Gazeta.uz» ga namoyishlarga maoshdagi kechikishlar sabab bo‘lganini tasdiqladi. Kompaniya rahbari Murod Nazarov esa ayni vaqtda «hammayoq tinchligi, ishchilar o‘z o‘rnida ishlayotganini va bunga binoning oxirgi qavatida osh tayyorlagani» sabab bo‘lganini ma’lum qildi. Poytaxt IIBB tekshiruv o‘tkazmoqda.

17 may 2022, 15:04

Antimonopoliya qo‘mitasi Sog‘liqni saqlash vazirligiga nisbatan ish ochdi

Antimonopoliya qo‘mitasi Toshkent shahri va viloyatidagi 178 ta laboratoriya Intermed Innovation kompaniyasiga o‘tkazilishiga oid ma’lumotlarni taqdim etmaganligi uchun SSVga nisbatan ma’muriy ish qo‘zg‘atdi. «Agar shu hafta berilmasa tegishli tartibda ma’muriy javobgarlik bo‘yicha choralar ko‘riladi», — dedi qo‘mita vakili.

17 may 2022, 13:54

Poytaxtda 4 oy ichida 7777 ta jinoyat fosh etildi

Toshkent shahrida yil boshidan beri 7777 ta jinoyat fosh etilib, 537 nafar qidiruvdagi shaxs ushlandi. Poytaxt IIBB ma’lumotiga ko‘ra, 2435 ta jinoyat ichki ishlar xodimlari tashabbusi bilan aniqlangan, shundan 769 tasi narkotik moddalar savdosi bilan bog‘liq. Buning natijasida 217,3 kg giyohvandlik va 24,3 kg psixotrop vositalar aylanmasining oldi olingan.

17 may 2022, 13:19 1

Prezident Vladimir Jonibekovni «Do‘stlik» ordeni bilan mukofotladi

Sovet ittifoqining ikki karra qahramoni, uchuvchi-kosmonavt Vladimir Jonibekovning 80 yoshga to‘lishi munosabati bilan O‘zbekiston prezidenti uni «Do‘stlik» ordeni bilan mukofotladi.

17 may 2022, 13:06

«O‘zbekkosmos» Buyuk Britaniyaning OneWeb kompaniyasi bilan hamkorlik qiladi

«O‘zbekkosmos» agentligi Buyuk Britaniyaning sun’iy yo‘ldoshli aloqa xizmatlarini ko‘rsatuvchi OneWeb kompaniyasi bilan hamkorlik memorandumini imzoladi. Tomonlar chekka hududlarni yuqori tezlikdagi internet bilan ta’minlash ustida ish olib borish niyatida.

17 may 2022, 12:54

O‘zbekistonning 9 viloyatida sel kelish xavfi e’lon qilindi

O‘zgidromet 18−23 may kunlari kutilayotgan kuchli yog‘ingarchiliklar tufayli O‘zbekistonning 9 viloyatida sel kelish xavfi mavjudligi haqida ogohlantirdi. Aholi va haydovchilardan ehtiyot choralarini ko‘rishlari so‘ralmoqda.


"Gazeta.uz"da ro`yxatdan o`tish

Qo`shimcha imkoniyatlarga ega bulish uchun saytda ro`yxatdan o`ting