O‘zbekistonda elektrlashtirilgan uylar uchun elektr energiyasiga imtiyozli tariflar joriy etilishi rejalashtirilmoqda. Bu haqda energetika vaziri Jo‘rabek Mirzamahmudov prezident bilan uchrashuvdan so‘ng “O‘zbekiston 24” telekanaliga bergan intervyusida ma’lum qildi.
Oxirgi sakkiz yilda elektr energiyasi ishlab chiqarish 38 foizga oshib, 81,5 milliard kVt/soatga yetdi. Xususiy sektorni jalb qilgan holda 11,2 GVt quvvatga ega yangi quvvat yaratildi. Natijada xususiy sektorning ishlab chiqarishdagi ulushi 24 foizga, “yashil” energiya ulushi esa 16 foizga yetdi.
O‘tgan yili aholi tomonidan elektr energiyasi iste’moli 4,1 foizga, sanoatda 6,1 foizga, transportda 10,6 foizga, ijtimoiy sohada 2,4 foizga, boshqa iste’molchilar tomonidan 5,5 foizga o‘sdi.
Davlat rahbarining so‘zlariga ko‘ra, 2030-yilga borib O‘zbekiston aholisi soni 41 million kishiga yetishi, iqtisodiyot 1,5 barobar o‘sishi prognoz qilinmoqda. Sanoatda 45 milliard dollar miqdorida qo‘shimcha qiymat yaratish, xizmatlar hajmini 3 barobar oshirish, yirik ma’lumotlar markazlarini ishga tushirish rejalashtirilgan.
“Kelayotgan har qanday investor kamida besh yil kafolatlangan elektr ta’minotini so‘raydi. Hozirgi rejalarimizga ko‘ra, 2030-yilda 117 milliard kVt/soat, 2035-yilda esa 135 milliard kilovatt/soat elektr energiyasi ishlab chiqarishimiz talab etiladi. Biz asta-sekin va har bir soha kontekstida bu ko‘rsatkichlarga erishish uchun puxta chora-tadbirlar ko‘rishimiz kerak”, — dedi prezident telekanal syujetida.
Yig‘ilishda energetika vaziri ushbu maqsadlarni amalga oshirishga qaratilgan uzoq muddatli dasturni taqdim etdi.
“O‘zbekiston 24” telekanaliga bergan intervyusida u yig‘ilishda nafaqat elektr energiyasini uzluksiz ta’minlash, balki uning tannarxini pasaytirish masalalari ham muhokama qilinganini ma’lum qildi. Tarmoqqa yangi elektr stansiyalari va energiya saqlash tizimlarini ulash uchun 7000 km magistral tarmoqlarni qurish rejalashtirilgan.
“Aholi, elektr transporti va boshqa sohalar, ayniqsa, elektrlashtirilgan uylar uchun elektr energiyasi iste’molini oshirish bilan birga, imtiyozli tariflar yaratish mexanizmlarini ishlab chiqish bo‘yicha topshiriq berildi”, — dedi Energetika vazirligi rahbari.
Unga ko‘ra, har bir vazifa bo‘yicha tegishli qaror va yo‘l xaritalari ishlab chiqilib, hukumatga yuboriladi.
Bundan tashqari, vazirning ta’kidlashicha, yangi loyihalarni mahalliylashtirish va mazmunini mahalliy mahsulotlar (kontent), jumladan, qurilish ishlari, mahsulotlar yetkazib berish, qurilish materiallari, metall konstruksiyalar, kabellar, transformatorlar bilan ta’minlash bo‘yicha ko‘rsatmalar berildi.
Davlat rahbari, shuningdek, Energetika vazirligiga boshqa idoralar bilan birgalikda 2035-yilgacha mo‘ljallangan yangi energiya quvvatlarini yaratish dasturini ishlab chiqishni buyurdi.
Shuningdek, kadrlar tayyorlash bo‘yicha alohida dastur ishlab chiqilib, Energetika vazirligi huzurida Energetika institutini tashkil etish rejalashtirilmoqda.
Oktabr boshida Energetika vazirligi rahbari 1-yanvardan boshlab gaz ta’minotisiz xususiy uylar uchun ijtimoiy norma doirasida elektr energiyasiga 50 foizlik chegirma joriy etish rejalashtirilayotganini ma’lum qilgandi. Noyabr oyida vazirlik matbuot xizmati chegirma joriy etish bo‘yicha hujjat loyihasi ishlab chiqilib, huquqiy ekspertiza uchun yuborilganini bildirgan. O‘shandan beri hujjat taqdiri va nima uchun chegirma 1-yanvardan joriy etilmagani haqida boshqa ma’lumot berilmadi.
