Islom Karimov va uning rafiqasi Tatyana Karimovaning xorijiy safarlari va O'zbekistondagi tadbirlar davomida olingan hamda 2020-yilgi fotoalbomga kiritilgan suratlari uzoq yillar birinchi prezidentning shaxsiy fotosuratchisi sifatida ishlagan O'zbekistonda xizmat ko'rsatgan jurnalist Farxad Kurbanbayev va fotorassom Temur Kurbanbayev tomonidan taqdim etilgan.

Tatyana Karimovaning qayd etishicha, "albomning yaratilishi bir necha dona oq-qora rangli fotosuratdan boshlangan".

"Uzoq yillar davomida birinchi prezidentning matbuot xizmatida fotosuratchi bo'lib ishlagan Farxad Kurbanbayev menga Islom Abdug'aniyevichning hayoti bilan bog'liq ayrim lahzalar aks etgan suratlarni ko'rsatdi. Fotosuratlarning noyobligi muallifning yondashuvida, tanlangan rakursda edi. Ya'ni, uchrashu va suhbat ishtirokchilari rasmiyatchilikdan xoli, erkin va samimiy holatda, kameraning ziyrak "nigohi"ni sezmayotgandik edi go'yo", — deya ta'kidlaydi Tatyana Akbarovna albomdagi kirish so'zida.

"Islom Karimov: Ulkan tarixiy davrni mujassam etgan inson" fotoalbomi, unda ta'kidlanishicha, "birinchi prezidentimiz hayotining yorqin lahzalari — oddiy insonlar, yoshlar hamda turli davlat rahbarlari bilan uchrashuvlari haqida hikoya qiladi". Ayni vaqtda, suratlarga hech qanday izoh yo sharh berilmagan, suratlar bo'yicha ma'lumotlar ko'rsatilmagan. "Chunki ularda bevosita birinchi prezident boshqaruvi davridagi muhit xolis va haqqoniy aks ettirilgan", — deya Tatyana Karimova suratlar sharhsiz berilganini izohlagan.