Samarqand tumanida 12 qavatli mehmonxona noqonuniy qurilgani, binoning seysmik holati talablarga javob bermasligi, kolonnalarning ayrim joylari darz ketgani sababli 2022-yilning may oyida uni buzish bo‘yicha “O‘zog‘irsanoatloyiha” xulosasi berilgandi.
Shu kunlarda esa ijtimoiy tarmoqlarda bu binoning pastki qavatida qahvaxona ish olib borayotgani aytilgan videolar tarqaldi.
Holat yuzasidan Qurilish va uy-joy kommunal xo‘jaligi vazirligi munosabat bildirdi.
Unda qayd etilishicha, vazirlikning viloyat boshqarmasi o‘rganish ishlarini olib borgan. Jarayon davomida binoning 1-qavatida noqonuniy ravishda qahvaxona faoliyat yuritayotgani aniqlangan.
“Ko‘plab muhokamalarga sabab bo‘layotgan bu bino bo‘yicha 2022-yilning 6-iyul kuni fuqarolik ishlari bo‘yicha Toyloq tumanlararo sudi tomonidan F.Xalilovga Samarqand tumani „Jo‘yisoy“ MFY hududidagi o‘ziga tegishli bo‘lgan, o‘zboshimchalik bilan noqonuniy ravishda qurilgan 12 qavatli bino-inshoot (mehmonxona)ni o‘z hisobidan buzishi to‘g‘risida hal qiluv qarori mavjud. Bugungi kunda mazkur sud qarorining ijrosi MIBning Samarqand tumani bo‘limi ish yurituvida”, — deyiladi xabarda.
Ta’kidlanishicha, Samarqand tumani qurilish bo‘limi tomonidan 2023-yil 15-may kuni MIB Samarqand tumani bo‘limiga sud qarorining ijrosini ta’minlash bo‘yicha xat yo‘llangan.
Ma’lumot uchun, qurilishi 2012-yilda boshlangan bino 2 qavat yerto‘laga ham ega. Qurilish ishlarida quyidagi qoidalarga amal qilinmagan:
- muhandislik geologiyasi, loyiha-smeta hujjatlari to‘liq ishlab chiqilmagan hamda tasdiqlanmagan;
- belgilangan tartibda shaharsozlik kengashidan o‘tmagan;
- mehmonxona majmuasi obyekti bosh rejasini naturaga ko‘chirish dalolatnomasi rasmiylashtirilmagan (SHNQ 3.01.01−03`ning 2.4 bandi bajarilmagan);
- qurilish obyektida foydalanilgan qurilish materiallarining talablarga muvofiqligi to‘g‘risidagi pasport va sertifikatlari taqdim etilmagan;
- Shaharsozlik normalari va qoidalarining (3.01.01−03) 7.8, 9.9 bandlariga asosan yopiq ishlarni guvohlash dalolatnomalari taqdim etilmagan.
Eslatib o‘tamiz, Toshkent shahri Uchtepa tumanida savdo va maishiy xizmat ko‘rsatish majmuasi eskiz loyihasida 3 qavat bo‘lishi ko‘rsatilgani, biroq amalda 12+1 qavat qilib qurilayotgani aniqlangan. Qurilish vazirligi boshqarmasi holatni o‘rganib, binoning qo‘shimcha qismini buzish bo‘yicha sudga da’vo arizasini kiritgan.
