6-aprel kuni prezident Shavkat Mirziyoyev yoshlar siyosati va sportni rivojlantirish bo‘yicha takliflar taqdimoti bilan tanishdi, deya xabar bermoqda davlat rahbari matbuot xizmati.

Yangi tizimga ko‘ra, yoshlar o‘rtasida festival, forum, tanlov va boshqa madaniy-ma’rifiy tadbirlarni yagona yillik kalendar reja asosida o‘tkazish joriy qilinadi va bu bo‘yicha ma’lumotlar yoshlarportali.uz yagona elektron platformasiga joylashtirib boriladi.

Ta’kidlanishicha, Yoshlar siyosati va sport vazirligi tarkibidagi 3 ta davlat unitar korxonasi faoliyati maqbullashtirilib, ularning funksiyasi xususiy sektorga o‘tkaziladi.

Davlat budjeti mablag‘laridan samarali foydalanish maqsadida sohadagi 24 ta yo‘nalishni qamrab olgan ERP Sport yagona elektron boshqaruv tizimi ishga tushiriladi. Kelgusi yildan boshlab musobaqalarda qatnashadigan sportchilarning shaxsi va malakasini identifikatsiya kartalari orqali aniqlash tartibi joriy etiladi. Sportga ҳомийлик ko‘rsatgan jismoniy shaxslarga chet ellardagi turnirlarda ishtirok etish imkoniyati beriladi. Buning uchun ular o‘rtasida lotereya o‘yinlari o‘tkaziladi.

Soha vakillarini qo‘shimcha rag‘batlantirish maqsadida vazirlikning stipendiyasi joriy etilmoqda. Shuningdek, sportchilarga huquqiy, tibbiy xizmatlar ko‘rsatish tadbirlari ham nazarda tutilmoqda, deyiladi xabarda.

Foto: Prezident matbuot xizmati

Shavkat Mirziyoyev O‘zbekistonda futbol eng ommaviy sport turi bo‘lgani sababli bu yo‘nalishni rivojlantirish masalasiga alohida to‘xtalib o‘tdi. FIFAning maxsus dasturi asosida bog‘cha va mahallalarda “Ommaviy futbol”, o‘rta ta’limda “Maktablarda futbol” hamda oliy o‘quv yurtlarida “Talabalar ligasi” dasturlarini joriy qilish taklifini berildi.

Iqtidorli futbolchilarni tanlash va tayyorlashning uzviyligini ta’minlash maqsadida O‘zbekiston futbol assotsiatsiyasi huzurida 14 ta futbol maktabi, “Do‘stlik” stadioni negizida barcha yosh toifalari uchun terma jamoalar markazi tashkil etiladi. Futbol bo‘yicha mutaxassislarni tayyorlash markazi faoliyati takomillashtirilib, Xorvatiya, Yaponiya va boshqa davlatlardan mutaxassislar jalb qilinadi.

Soha infratuzilmasini rivojlantirish uchun O‘zbekiston futbolini qo‘llab-quvvatlash jamg‘armasi tuziladi. Qoraqalpog‘iston Vazirlar Kengashi raisi, viloyatlar va Toshkent shahri hokimlari hududiy futbol assotsiatsiyalarining rahbarlari etib belgilanadi.

Davlat rahbari bu takliflarni qo‘llab-quvvatlab, ularni samarali amalga oshirish yuzasidan ko‘rsatmalar berdi.