Dekabrdan kuzatilgan qattiq sovuqlar, yanvarda uning anomaliyaga aylanishi gaz ta’minotida jiddiy muammolar keltirib chiqardi. Oqibatda o‘tgan qishlarda hech bo‘lmasa ma’lum soatlarda ishlashiga ruxsat berilgan gaz-zapravkalar faoliyati bu safar energetika inqirozi, gaz yetishmovchiligi tufayli butkul to‘xtatildi, bu esa benzinga bo‘lgan talabning keskin oshishiga sabab bo‘ldi. Avvallari yilda bir yo ikki marta ro‘y beradigan narx o‘sishi arafasida kuzatiladigan, so‘nggi 5−6 yilda esa “avvalgi zamon"da qolib ketgandek tuyulgan benzinga navbatlar bu yilgi qish mavsumida yana kun tartibiga qaytdi.

Benzin ta’minotiga mas’ul korxona va tashkilotlar qish boshida yonilg‘i yetishmovchiligi haqidagi gap-so‘zlar asossiz ekanini iddao qilayotgandi. “O‘zbekneftgaz"ning so‘nggi bayonotida esa avtomobillarga benzin quyish shoxobcha (AYoQSh)laridagi uzun navbatlar sun’iy taqchillik va ortib borayotgan talabni qondirish uchun ishlab chiqarish quvvatlarining yetishmasligi oqibatida yuzaga kelayotganini ma’lum qildi.

Hukumat vaziyatni o‘nglash uchun Rossiyadan benzin import qilishga kirishgan. Bundan tashqari, kunlar ilishni boshlashi bilan gaz-zapravkalar faoliyati ham (xususan, karnay-surnay sadolari ostida) qayta tiklanmoqda. Haydovchilarning ta’kidlashicha, buning samarasi 4−5 fevraldan sezila boshladi — benzin-zapravkalardagi “kilometrlik navbatlar” siyraklashgan. “Gazeta.uz” muxbiri aynan shu kunlarda Toshkentdagi bir qator AYoQShlarda bo‘lib, navbatlarni fotosuratlarga muhrladi.

"Gazeta.uz"da reklama






Telegramdan foydalanasizmi? Muhim yangiliklarni o‘tkazib yubormaslik uchun kanalimizga a’zo bo‘ling.