7 dekabr kuni Shavkat Mirziyoyev yer osti suvlarini muhofaza qilishga qaratilgan chora-tadbirlar taqdimoti bilan tanishdi, deya xabar berdi Prezident matbuot xizmati.

Qayd etilishicha, yer osti suvlaridan tartibsiz foydalanish oqibatida ko‘p joylarda yer osti suvi kamayib ketmoqda. Navoiy, Samarqand, Jizzax, Qashqadaryo, Namangan, Farg‘ona va Andijon viloyatlarining ayrim hududlarida uning sathi 5 metrgacha pasayib ketgan.

Joylarda ruxsatsiz quduqlar burg‘ilash, yer osti suvlaridan nazoratsiz va hisobsiz foydalanish hamon davom etmoqdaligi ta’kidlandi. Shu bois, prezident ko‘rsatmasiga muvofiq, yer osti suvlari muhofazasini kuchaytirish va undan foydalanishni takomillashtirish bo‘yicha takliflar ishlab chiqildi.

Foto: Prezident matbuot xizmati

Unga ko‘ra, yer osti suvining sathi 5 metrdan ziyod pasaygan hududlarda quduqlar burg‘ilash va yer osti suvlaridan foydalanishga moratoriy joriy qilinadi.

«Hozirgi kunda quduqlarning 90 foizida hisoblagich yo‘qligi sababli yer osti suvlari sarfi to‘g‘risida aniq ma’lumot to‘plash imkoni bo‘lmayapti. Shuning uchun yer osti suvlaridan foydalanuvchilarga 2024 yil 1 yanvarga qadar o‘z tasarrufidagi inshootlarni suv hisoblagich bilan jihozlash majburiyati qo‘yilmoqda», — deyilgan xabarda.

Shuningdek, 2023 yil 1 apreldan boshlab har bir quduqqa alohida emas, balki quduqlarni burg‘ilash faoliyatiga ruxsatnoma berish yo‘lga qo‘yiladi. Sathi pasayib ketayotgan yer osti suvi konlarini tubdan qayta baholash bo‘yicha geologiya-qidiruv ishlari amalga oshiriladi.

Yer osti suvlarining holatini kuzatib borish, xavfli geologik jarayonlardan muhofaza qilishning yagona tizimini yaratish maqsadida Davlat geologik monitoring xizmati tashkil etiladi.

Davlat rahbari bu takliflarni ma’qullab, suvdan hisobsiz foydalanishga chek qo‘yish, bu borada intizomni kuchaytirish bo‘yicha ko‘rsatmalar berdi. Chuchuk suv manbalarini asrash va aholi uchun uzoq muddatga yetadigan zaxira yaratish muhimligini ta’kidladi.