O‘zgidromet markazi hafta davomida — 21 noyabrdan 25 noyabrgacha bo‘lgan davrdagi ob-havo ma’lumotlarini e’lon qildi.
Dushanba kuni O‘zbekiston bo‘yicha kam bulutli va quruq ob-havo bo‘lishi kutilmoqda, faqat Navoiy viloyatining shimoliy hududlarida, shuningdek, Toshkent viloyatining ba’zi joylarida frontal bulutli chiziqlar o‘tishida biroz yomg‘ir yog‘ishi mumkin, tog‘li hududlarda yog‘ingarchilik (yomg‘ir, qor) bo‘ladi.
Kunduzi havo harorati +13…+15 daraja, janubda +18…+21 daraja atrofida bo‘ladi.
Seshanba kunidan ish haftasining oxirigacha O‘zbekiston hududiga Eron hududlaridan quruq va iliq havo kirib kelishi kutilmoqda. Harorat foni +6…+8 darajaga ko‘tariladi. Shuningdek, seshanba kuni kunduzi harorat +15…+17 darajagacha, so‘ng esa +18…+20 daraja, ayrim joylarda esa +23 darajagacha ko‘tariladi.
Respublika bo‘yicha yog‘ingarchilik kutilmaydi, faqat Toshkent viloyatining ayrim joylarida seshanbaga o‘tar kechasi biroz yomg‘ir yog‘ishi mumkin, tog‘larda yog‘ingarchilik bo‘ladi.
21−22 noyabrda respublikaning tog‘li hududlarida qor ko‘chishi xavfi bor, respublikaning ayrim joylarida shamol 15−20 m/sekundgacha kuchayishi kutilmoqda. Respublika bo‘yicha ba’zi joylarga tuman tushishi mumkin.
