Illyustratsiya: Eldos Fozilbekov / «Gazeta.uz»
«Mayli, imkoniyat bermang, lekin xalaqit ham qilmang!»
O‘zbekistondagi yosh oilalar bilan suhbat

«Mayli, imkoniyat bermang, lekin xalaqit ham qilmang!» — O‘zbekistondagi yosh oilalar bilan suhbat

Bugun oila borasidagi muayyan stereotiplar o‘zgaryapti: ayol ro‘zg‘oridan ortib, tanlagan soha, kasb-korida, jamoasida yutuqlarga erishyapti, turmush o‘rtog‘i ham uni qo‘llab-quvvatlayapti. Yana yosh oilalarning ko‘pi orzu-niyatiga birgalikda – qo‘sh qanot bo‘lib, er-xotin bir yoqadan bosh chiqarib oldinga intilyapti. Ammo ikki yoshning maqsadini to‘la-to‘kis ro‘yobga chiqarishga xalal beradigan to‘siqlar, jamiyatdagi chegaralar ancha-muncha. Buni yashirib bo‘lmaydi.

Kimdir uchun uy, mashina olish, bolasini bog‘chaga joylashtirish, o‘zi xohlagan ilmiy ishini qilish uchun topayotgan daromadi qoniqarli emas, qaysidir oila yurtdagi sharoitni orzularini amalga oshirishga mos hisoblamay, xorijga ketishni afzal biladi, taʼlim sifati pastligidan qayg‘uradi, boshqasi tanlagan sohasidagi ichki «qonun»lardan norozi. Statistika qo‘mitasining taqdim etgan maʼlumolariga ko‘ra, 2022-yilning 9 oyida 162 962 nafar 30 yoshgacha bo‘lgan yoshlarning nikohi qayd etilgan.

«Gazeta.uz» O‘zbekistondagi bir nechta yosh oiladan bugun ularni qiynayotgan muammolar, o‘zgarishu imkoniyatlar qay darajadaligi, oila qurish to‘g‘risidagi xulosalari, kelajak rejalari haqida so‘radi.
Suhbatdoshlar haqida maʼlumot
Temur Umarov va Dilbar Umarova
Temur – 25 yosh, Dilbar esa – 26 yoshda. Ular 2022-yilda oila qurishgan.

Ikkisi ham Toshkentdagi Xalqaro Vestminster universitetini tamomlagan. Temur «Nextmark.uz» marketing korxonasi asoschilardan biri. Dilbar hozirda «Chex IT» kompaniyasida operatsion mutaxassis sifatida ishlaydi.
Ahror Sharif va Mahin (Mohina Nursaidova)
Ahror – 24 yosh, Mahin esa – 27 yoshda. 2021-yili turmush qurishgan.

Har ikkisi ham Oʻzbekiston davlat jahon tillari universitetini tamomlagan. Ahror AKT vazirligi tasarrufidagi markazda ishlaydi, boʻsh vaqtlarida kitob tarjimonligi bilan shugʻullanadi. Mahin hozirda Fanlar akademiyasi PhD tayanch doktoranti hisoblanadi. Qolaversa, u «Oʻzbekiston Ikkinchi jahon urushi davrida» loyihasida ilmiy xodim.
Xurshid Serobov va Gulzoda Safarova
Xurshid – 27 yosh, Gulzoda esa – 24 yoshda. 2021-yili oila qurishgan.

Ikkisi ham Alisher Navoiy nomidagi Toshkent davlat oʻzbek tili va adabiyoti universitetini bitirgan. Xurshid Ijtimoiy-maʼnaviy tadqiqotlar instituti kichik ilmiy xodimi. Gulzoda ilgari «Madaniyat va maʼrifat» telekanalida muharrir boʻlib ishlagan.
Timur Salimov va Hilola Gʻayratova
Timur – 27 yoshda, Hilola esa – 21 yoshda. 2021-yili turmush qurishgan.

Timur 2019-yilda I.M.Gubkin nomidagi Rossiya davlat neft va gaz universitetida magistraturani tamomlagan. Ayni damda «Zoʻr TV» telekanalida kreativ prodyuser, rejissyor boʻlib ishlaydi. Hilola esa Oʻzbekiston davlat sanʼat va madaniyat instituti 3-bosqich talabasi. “The Cover Up” loyihasi final qismi ishtirokchisi.

Javohirbek Abdullayev va Dilafruz Abdullayeva
Javohirbek – 27 yosh, Dilafruz esa – 25 yoshda. 2022-yili turmush qurishgan.

Javohirbek Andijon davlat universitetini tamomlagan. U «Bon Profi Media» media xoldingida marketing boʻlimi rahbari sifatida ishlaydi. Dilafruz 2022-yili Oʻzbekiston jurnalistika va ommaviy kommunikatsiyalar universitetining magistratura bosqichini tamomlagan. Toshkentdagi Webster universitetida raqamli kontent boʻyicha mutaxassis (digital content specialist) boʻlib ishlaydi.

— Oʻzbekistonda boʻlayotgan islohotlar hayotingizga taʼsir qildimi? Yoshlar uchun eʼtibor qaysi tarafga va qanchalik oʻzgardi, sizningcha?
Dilbar Umarova

Oʻzbekiston aholisining asosiy qismi 30 yoshgacha boʻlgan yoshlardan tashkil topgan muhim demografik bosqichda turibdi. Kelgusi 20 yillikda bugungi yosh avlod mamlakat mehnat resurslarining asosiy kuchiga aylanadi. Ularning rivojlanishiga toʻgʻri sarmoya kiritilsa, taʼlim nisbatan yangi iqtisodiy darajaga chiqishi mumkin.


Jamiyatdagi stereotiplar, avvaldan oʻrnatilgan, bugungi voqelikka hech qanday aloqasi yoʻq anʼanalarni buzib tashlaydigan kichik, erkin fikrli yoshlar qatlami paydo boʻlgani sezilmoqda. Ijtimoiy tarmoqlar, taʼlim platformalari orqali XXI asrning muhim va zarur yoʻnalishlari ochiq va faol ravishda targʻib qilinmoqda. Masalan, taʼlimning ahamiyati va zarurligi, chet elda oʻqish, feminizm haqida gapirish, kasbiy tajriba almashish kabilar. Fikrimcha, bu juda zoʻr! Eng muhimi, shu qadar qizgʻin voqealar orasida jasur, aqlli va goʻzal qizlarning koʻpligi meni xursand qiladi.

Temur Umarov

Savolni javobsiz qoldirdi.

реклама
реклама
Mohina Nursaidova

Savolni javobsiz qoldirdi.

Ahror Sharif

Islohotlarning natijasini internet, televizor yoki hisobotlarda aytilayotgan gaplardan emas, oddiy oʻzbekistonlik yoshlarning hayotidan qidirish kerak. Oʻzim va atrofimdagilarning hayotiga boqsam, yaxshigina ijobiy oʻzgarishlari topishim mumkin.


Misol uchun, avvallari juda koʻp viloyatlik iqtidorli yoshlar «propiska» sababli poytaxtdagi markaziy davlat idoralarida faoliyat yuritish imkoniyatiga ega boʻlishmagan. Universitetni bitirib davlat ishiga kirish uchun suhbatga borganimda pasportimdagi muhrga emas, koʻproq qoʻlimdan keladigan ishga eʼtibor berilganda islohotlarning natijasini his qilganman.


Yana tengdoshlarimiz, uka-singillarimizning ijtimoiy tarmoqlar orqali oʻz fikrlarini bildirayotgani, loqaydlikni yigʻishtirib, mamlakatdagi ijtimoiy-iqtisodiy jarayonlar toʻgʻrisida tasavvurga ega boʻla boshlaganini ham ijobiy jarayon deb baholasak boʻladi.

Gulzoda Safarova

Bugun yoshlarga koʻp imkoniyatlar yaratilgan. Ammo hammasi qogʻozdan amalga oʻtishi kerak. Yigit-qizlar oʻzga yurtlardan najot izlamasliklari uchun ham shunchaki tenglikka rioya etilsa boʻldi.

Xurshid Serobov

Aniq bir sohadagi islohotlar haqida fikr bildirish uchun oʻsha sohaning mutaxassisi boʻlish kerak deb oʻylayman. Faktlar bilan gapirganda hammasi oydinlashadi. Menga umumiy koʻringan manzara: hammasi yaxshi tomonga oʻzgarishi uchun harakat bor. Ammo bu harakat jadallashishi kerak. Bir maromda davom etsa ham mayli, orqaga qarab ketmasa boʻlgani.


Har bir tizimda yosh kadrlar koʻrina boshlayapti. Oʻylaymanki, juda koʻp holatlarda yoshlarga imkoniyat berish shart emas, shunchaki xalal berilmasa, bas. «Oldini qaytarma», degan gap bejiz aytilmagan. Yoshlikka «gʻoʻrlik» sifatini taqamaslik lozim deb bilaman. Bir joyda turgan suv kirlanib qoladi. Daryo doim oqib turishi kerak.

Hilola Gʻayratova

2017-yili Respublika sirk kollejiga oʻqishga kirgandim. Oʻshandan hozirgacha kuzatuvlarim asosidagi xulosalarim ijobiy.

Timur Salimov

Islohot taʼlimda koʻproq sezilyapti. Bu tizimda xususiy tarmoq kengaya boshladi. Maktablar, oʻquv markazlari, universitetlar ochilmoqda. Raqobat bor joyda, albatta, oʻsish boʻladi. Avvallari Toshkentda bu darajada koʻp oʻqiydiganlarni koʻrmas edik. Kamchiliklar yoʻq emas. Ammo jarayon shunday davom etsa, xususiylashtirish kengaysa, ular bilinmay ham ketadi.

Dilafruz Abdullayeva

Eng koʻzga koʻrinadiganlari sifatida doimiy yashash joyi – «propiska»ning yengillashtirilgani, xususiy tadbirkorlikka imtiyozlar berilayotgani, oʻquv muassasalari sonining ortishi kabilarni koʻrsatishim mumkin.

Javohirbek Abdullayev

Oxirgi 5-6 yillikda Oʻzbekistonda koʻp narsa oʻzgardi. Albatta, yaxshi va yomon tomonga. Aynan yoshlarga bilvosita taʼsir qilgan islohotlardan biri oliy taʼlimga kirish imtihonlarida ochiqdan-ochiq oʻyinlarga chek qoʻyilgani deya olaman. Boshqa tomondan, bilim darajasi yetarli boʻlmagan abituriyentlar uchun superkontrakt tizimi joriy qilinib katta xatoga yoʻl qoʻyildi. Imtihonlardan keyingi taʼlim sifati haqida gapirayotgan birinchi odam boʻlmasam kerak.


Ortga nazar tashlasak, bir necha oʻn yillar davomida oliygohlar tayyorlagan yuz minglab pedagoglar endilikda qaysidir maktabda farzandlarimizga dars oʻtmoqda. Ushbu tizimni «tozalamaslik» bizga hali ancha qimmatga tushishi mumkin. Umuman, oliy taʼlimga kirish oson, 4 yil oʻqib, kursdan qolib ketmasdan bitirib olish esa katta mashaqqat talab qiladigan tizim boʻlsagina koʻp muammolar barham topadi deb oʻylayman.

«Odamlarimiz hali tayyor emas» qabilidagi fikrlarga qanday qaraysiz?
Dilbar Umarova

Biz koʻpincha butun Oʻzbekiston va unda yashovchi odamlarni faqat poytaxt aholisining farovonligiga qarab baholaymiz. Lekin Toshkent – butun boshli mamlakat emas. Ishonchim komilki, tahririyatingizning koʻplab oʻquvchilari Maslouning «Ehtiyojlar piramidasi» haqida bilishadi. Unga koʻra, barchamizda ehtiyojlar iyerarxiyasi mavjud. Asosiy ehtiyojlar qondirilmasa, boshqa narsa haqida oʻylash qiyin. Agar ishda sizga kam maosh toʻlansa va kechasi uxlamasdan oilangizni qanday boqish haqida bosh qotirsangiz, oʻzingizni anglash haqida oʻylashingiz dargumon.


Xullas, viloyatlar, uzoq tumanlar va qishloqlarda yashovchi yurtdoshlarga «Maslou piramidasi»ga koʻra munosib hayot kechirish uchun ozgina narsa kerak. Ular sogʻlom boʻlsa, barqaror ish topsa, daromadini oilasidagilarni boqish, kiyintirish, oʻqitishga yetkizolsa, qishda gaz va chiroq uzilmasa – ulardan baxtlisini topolmaysiz.


Qisqacha aytganda, biz nimaga tayyor boʻlishimiz kerak? Sifatli taʼlimgami? Yoki munosib tibbiy yordamgami? Uyimizda oʻchmaydigan gaz va elektr energiyasi boʻlishigami? Yoki yaxshi ish sharoitlarigami? “Odamlar bunga hali tayyor emas” deganlarni shu savollar qiziqtiradimi? Katta ishonch bilan aytamanki, odamlar bunga allaqachon tayyor.

Temur Umarov

Savolni javobsiz qoldirdi.

Mohina Nursaidova

Jamiyatni ilm qutqaradi. Ilm esa kitobdan, taʼlimdan. Taʼlim sifati oshmas ekan, bilim haqida soʻz borishi ham mumkin emas. Dunyoqarashga keladigan boʻlsak, turli sohalarda izlanish, oʻzni qidirish, chet el yoshlari bilan muloqot qilish (bunda turli xalqaro konferensiyalar, oromgohlar va tadbirlar misol boʻla oladi), ilmiy kitob mutolaasini uzluksiz ravishda olib borish kerak. Odam oʻz-oʻzidan tayyor boʻlmaydi, u yoshligidan oʻsadi va unadi. Mehnat qilinmas ekan, ertaga mevasi ham tayyor boʻlmaydi.



Ahror Sharif

Toʻgʻrisini aytsam, ilgari men ham «odamlar tayyor emas» degan ideologiyaga ishonganman. Hammaga gapirish imkoni berilsa, yovvoyi bir jamiyat hosil boʻladi deb hisoblaganman. Biroq keyinchalik amin boʻldim-ki, odamlar hech qachon tayyor boʻlmaydi. Shuning uchun hech narsadan tap tortmay, «komfort zona»dan chiqib, oʻzgarishlar sari dadil qadam tashlayverish kerak ekan.


Jamiyatdagi muammolar, odamlarning fikrlashi, dunyoqarashi va bilimining yetarli darajada yaxshi emasligi haqida koʻp gapirilgan, gapirilmoqda va bundan keyin ham gapiriladi. Men bu borada jamiyatni ayblamagan boʻlardim. Misol uchun, Shimoliy va Janubiy Koreyani olaylik. Bir millat, bir mentalitet, bir geografik hududdagi odamlar dunyoqarash va bilim borasida keskin farq qiladi. Demak, masala davlat siyosati va boshqaruvi oʻrtasidagi farqqa borib taqalmoqda.


Singapurni uchinchi dunyo mamlakatidan boy va aholisi farovon davlatga aylantirgan omil ham konstruktiv boshqaruv va xalqparvar siyosat boʻlgan. Mamlakatda qoʻrquv muhiti kezib yursa va notoʻgʻri boshqaruv siyosati amalga oshirilsa, xalq xolis axborot olish imkoniyatidan toʻsilib, biqiq muhitda ihotalanib yashashga majburlansa, xalqning bilimi va saviyasi oshishini, dunyoqarashi kengayishini kutishdan umuman maʼno yoʻq.

Gulzoda Safarova

Bugun oʻzini jamiyatning bir boʻlagiman deb biladigan, fikrlarini joyiga «mixday qoqib, qalpogʻini sugʻurib oladigan» har qanday odam «bu men uchun emas» qabilida ish koʻradiganlarni bemalol izidan ergashtira oladi. Jamiyatni orqaga tortuvchi emas, aksincha, olgʻa boshlovchi fikrlarga ehtiyojimiz katta.

Xurshid Serobov

«Odamlar hali tayyor emas», degan gapni miyamizdagi lugʻatdan bemalol oʻchirib yuborsak boʻladi. Jamiyat turli toifa, turli darajadagi odamlardan tashkil topgan. Demak, umumiylik jihatidan har qanday oʻzgarishga tayyor. Chunki jamiyat qozondagi osh emas, qachon tayyor boʻlsa, suzamiz deydigan.

Hilola Gʻayratova

Bu jumla bilan biror boshlamoqchi boʻlgan ishni toʻxtatish, keyinga qoldirish yoki uni oʻzgartirib, odamlarga tushunarli boʻladi deb juda past darajada olib chiqish mutlaqo notoʻgʻri. Odamlar oʻz-oʻzidan tayyor boʻlmaydi. Tayyor boʻlishi uchun ham boshlash kerak.

Timur Salimov

Bunga qarshiman. Rosti, bu jarayonni chaqaloqni 2-3 yoshligida taglikdan tuvakka oʻrgatish boshlanishiga oʻxshataman. Bola hali tayyor emas deb tuvakka oʻtkazish choʻzib yurilaversa, u taglikda qolib ketadi. Umuman, odamlarga kerakli yangi islohot qilish yoki yangi narsani oʻrgatishdan qoʻrqish kerak emas. Agar ularga shu foyda keltirsa, bunga oʻrganadi, tayyor boʻladi.


Aytish ham, tan olish ham ogʻir – jamiyatimizda savodsizlar koʻp. Oʻqigan, uqqanlarning juda koʻpi chetga ketgan va bu jarayon hamon davom etmoqda. Oxirgi 4-5 yilda yangiliklar, islohotlar qilingani bilan dunyodan orqadaligimizni hamma biladi.


Baliq koʻlmakni dengiz deb bilganidek, koʻpchilik insonlar Oʻzbekistonni dunyo deb hisoblaydi. Hamma narsani faqatgina oʻzining qarichi bilan oʻlchaydi. Dunyoqarashni kengaytirish kerak. Buning uchun imkon qadar sayohatlarga borish, boshqa davlatlardagi odamlar bilan suhbatlashish zarur. Shunda kishi oʻzinikidan boʻlak hayotni koʻradi, taqqoslaydi, tahlil qiladi, koʻrgan qandaydir yangiliklarini Oʻzbekistonga olib keladi.

Dilafruz Abdullayeva

Aslida zamon emas, odamlar oʻzgaradi va oʻzlari oʻsha oʻzgarishlarni qabul qilishga qiynalishadi. Qabul qilish uchun esa oʻrganishga ochiq boʻlish kerak. Oddiy bankomatni ishlatishga qiynalayotgan aholiga raqamli islohotlarni tushuntirish oson emas. Buning uchun ularning oʻzi shu kabi yangiliklarga qiziqishi kerak.


Masalan, metro va avtobuslarda yurishni qulaylashtirish uchun yoʻl kartalari joriy etilgan. Ammo odamlar hamon uzundan-uzun navbatda turib, bir martalik yoʻl chiptasi olishadi. Vaholanki, yoʻl kartalarining afzalligi, ularni ishlatish boʻyicha yoʻriqnomalar metro bekatlarida doim aylanadi. Biroz eʼtiborli boʻlgan kishi keyingi safar yana shunday navbatda turishdan oʻzini qutqaradi. Oʻzgarishlarni qabul qilishni, oʻrganishni istamaganlar esa jamiyatdagi kamchiliklardan nolib yuraveradi. Oʻylashimcha, dunyoqarash, fikrlash oʻzgarishi uchun avvalo maʼlumotlarni filtrlay bilish kerak. Qaysi maʼlumot ular uchun manfaatli, qaysilari esa aksincha.

Javohirbek Abdullayev

Aslida, odamlar hali tayyor emas, deb gapirayotgan inson oʻzi haqida soʻzlayotgan boʻladi. Ayni vaqtda jamiyatning fikrlashi, dunyoqarashi, ming afsuski, xursand qiladigan darajada emas. Eng boshlangʻich bilimlar boʻyicha oddiy mavzularda qiynalishadi. Aksariyatda bazaviy falsafiy tushunchalar mavjud emas. Taʼlimni isloh qilish, insonlarga kitob oʻqish foydali ekanini singdirish orqali ommani yangi darajaga olib chiqish mumkin.

— Oila qurish uchun yoshlarga qanday maslahatlarni berasiz? Sevib-sevilib turmush qurgan afzalmi yoki kelishib? Oila qurgan yoshlar qanday mushtarak reja va maqsadlar qilsa, oʻziga foydali boʻladi?
Dilbar Umarova

Turmush oʻrtogʻim bilan 17 yoshda, abituriyentlik paytimiz, Milliy kutubxonadagi ingliz tili toʻgaragida tanishganmiz. Shundan soʻng Xalqaro Vestminster universitetida birga tahsil oldik va Germaniya hukumatining DAAD stipendiyasini qoʻlga kiritdik. Keyin birga magistraturada oʻqish uchun Germaniyaga uchib ketdik. Sayohat qildik, 20 dan ortiq mamlakatlarda boʻldik.


Men nikoh umumiy qadriyatlar, hayotdagi katta maqsadlar va muhabbat asosida qurilishi kerak deb hisoblayman. Qolaversa, odamlarning taqdiri hamma uchun har xil boʻlishini ham inkor etmayman. Har doim ham muhabbat bilan oila qurib boʻlmaydi. Lekin birovning tavsiyasiga asoslanib turmush qurib ham munosib hayot kechirish mumkin.


Yoshlarga maslahatim – turmush qurishga shoshilmang. Yoshlikni puxta taʼlim, oʻz-oʻzini anglash va sayohatga sarflang. Tez-tez «Men kimman?», «Nima qilishni xohlayman?», «Bu hayotda qanday yashagim keladi?», «Ortimdan qanday yaxshiliklarni qoldirmoqchiman?» kabi savollarni oʻzingizga berib turing.

Temur Umarov

Oila masalasida, albatta, ota-onadan maslahat olish kerak. Ammo har bir inson oxirgi qarorni oʻzi mustaqil qabul qilsin. Keyingi harakatlariga ham oʻzi javob beradi-da shunda.


Oʻylashimcha, yaxshi kelin yoki kuyov topish qiyin emas. Ammo har bir kishining feʼl-atvoriga mos insonni topish judayam qiyin. Sevgi tuygʻusi irratsional masala boʻlishi mumkin. Yaʼni shunchaki kimnidir sevasiz va nimaga sevishingizni bilmaysiz.


Oila qurish masalasida shoshilmaslik, har bir inson oʻziga mosini izlashi kerak deb hisoblayman. Turmush qurayotgan juftlarning yaxshi kunlarda emas, balki qiyin vaziyatlarda bir-biriga qanday munosabatda boʻlishi muhimroq. Dilbarxonni 2014-yildan beri taniyman. 2022-yilda toʻy qildik. 8 yil ichida koʻp sinovlardan oʻtib, bir-birimizga moslashdik.

Mohina Nursaidova

Oʻzim ham, ota-onam ham aynan sevib turmush qurganmiz. Shuning uchun sevib oila qurishni yoqlayman. Juft tanlash oson emas. Eng avval qiziqishi, hayotga boʻlgan qarashi (jiddiymi yoki hanuz oʻyinqaroq), prioritetlarini inobatga olish kerak. Ikki qutb kishisi – kelajakda mutlaq turli rejaga ega boʻlgan insonlarni bir tizginga tushishi oson boʻlmaydi.


Menimcha, oila qurishdan avval reja tuzish kerak. Izlanish, oʻqishdan, bilim olish va yangi eshik ochishdan toʻxtamaslik kerak. Ikki inson bir-biriga ham ong, ham qalban oʻsishida yelka tutishi kerak. Faqatgina bir taraf oʻsib, ikkinchisi joyida qotsa, shu hayotga oʻrganib qolishadi va «bori shu ekan«» degan gap paydo boʻladi.


Oila tinimsiz mehnat va sarmoya talab qiladi. Ikki tomon bir-biriga toʻxtovsiz investitsiya kiritadi. Qiziqishlar eshitiladi, rejalarga quloq tutiladi, maqsadlar boʻlishiladi va bir yoqadan bosh chiqariladi. Bu quruq gapdek tuyulishi mumkin. Ammo turmush qurgandan soʻng oila nomli qobiq oʻz domiga tortishi juda oson. Odam dangasa boʻlib qoladi. Xuddiki yoshini yashagan qariyadek qoʻlini siltaydi va chuqur tin oladi.


Yoʻq, aksincha, yanada qattiq mehnat ayni shu yerda boshlanishi darkor. Bilim olish va oʻrgatish, kitob oʻqish, soʻrash, izlanish, kechanikidan-da bugun koʻproq marralarga erishish ayni juft bilan yoqimliroq boʻladi. Shu boisdan ham oila qurishdan oldin maqsad va rejalar ochiq gaplashib olinishi kerak.

Ahror Sharif

Oila qurish bu oʻta shaxsiy, bir qolipga solib boʻlmaydigan, har bir juftlik uchun individual masala. Ammo, aytishim mumkinki, ikki yosh oʻrtasidagi fikr, saviya, dunyoqarash va bilimdagi mushtaraklikning oʻzi yaxshi oila boʻlish uchun kifoya qilmaydi. Atrofdagi jamiyat, yaqin qarindoshlar, ikki tomon ota-onasi oʻrtasidagi munosabatlar ham oila hamjihatligini saqlashda muhim oʻrin tutadi.


Umuman olganda, yuqorida sanab oʻtilgan omillar taroziga solinganda sevgi-muhabbat hamda ikki yoshning maqsadlari birligidan ogʻirroq tosh bosib qoʻyishi mumkin. Bu borada realist boʻlish kerak deb hisoblayman. Faqat muhabbatga tayanish turli-tuman sinovlar uchun yetarli boʻlmasligi, har qanday mushtarak juftlik orasiga darz ketishi hech gap emas.

Gulzoda Safarova

Kimdir sevib turmush qurishni afzal koʻrsa, yana kimdir kelishib turmush quradi. Har ikki holatda ham oila mustahkamligini saqlab qolish erkak va ayolning zimmasida boʻladi. Asosiysi, bir-birini tushunib, fikrlari, xohish va istaklarini qoʻllab-quvvatlab yashash.

Xurshid Serobov

Hamma inson oʻzgarishni oiladan boshlashi eng maqbul yoʻl. Har bir oila bilimli, salohiyatli farzandlarni tarbiyalasa, hamma yutadi. Oila qurishda muhabbat muhim. Bu kinolaru kitoblardagi boʻrttirilgan hissiyotlar qorishmasi emas, tushunish, bir-birini qoʻllash va qadrlay bilishdir.

реклама
реклама
Hilola Gʻayratova

Boʻlajak turmush oʻrtoqni yaxshilab oʻrganib, tanlovning toʻgʻri, yaxshiligiga ishonch hosil qilgandan keyingina oila qurish kerak. Nikoh bilan faqatgina bir oila bunyod boʻlmaydi, bir nechta oilalar birlashadi. Ana shu birlashuvning qanchalik bardavom boʻlishi koʻproq ikki insonga bogʻliq.


Qiz bola turmushga chiqqunicha uning yashash tarzi, shugʻullanadigan mashgʻulotlari, kasbi va boshqa holatlari ota-onasiga, keyinchalik esa turmush oʻrtogʻiga bogʻlanadi. Shuning uchun oila qurishdan oldin juft sifatida tanlagan insoni va uning oilasi oʻsha qizning maqsadlari, oldiga qoʻygan rejalarini amalga oshirishga imkon berish yoki bermasligiga amin boʻlib olish kerak. Agar turmush oʻrtoq tushunsa, yaxshi koʻrsa, boshqa oila aʼzolariga koʻnikish ham osonroq boʻladi.


Men ham, turmush oʻrtogʻim ham sanʼat sohasidanmiz. Biz bir-birimizni toʻydan oldin ham qoʻllab-quvvatlaganmiz. Ular meni oʻz loyihalariga chaqirib, bilmaganlarimni tushuntirib, yordam berganlari uchun toʻydan keyin ham shunday davom etishlariga ishonch hosil qilganman va oila qurishga rozi boʻlganman.

Timur Salimov

Oila qurishga shoshish kerak emas. Odam oʻzini anglab, maqsadlarini bilgandan keyin juft qidirishni boshlasa, boʻladi. Yaxshi koʻrib, aniq maqsad bilan qadam tashladimi, endi shu mening oilam boʻladi, umrimning oxirigacha yaxshi kunni ham, yomonini ham birgalikda oʻtkazaman, degan toʻxtamga kelgandagina oila qursa boʻladi.


Turmush sevgi va kelishuv asosida qurilgani maʼqul. Bu borada hammada prioritet qoʻyish har xil boʻladi. Ikki taraf ham oʻz oilasi, ota-onasining xohishlarini eshitishi, inobatga olishi, munosabatlarda keyinchalik kelib chiqadigan darz ketishlarning oldini olishi mumkin.

Dilafruz Abdullayeva

Oila qurishni ikki kishi taqdirining koʻpchilik aralashuvida hal qilinishi desa ham boʻladi. Aynan oʻsha koʻpchilik – ikki tomon urugʻ-aymogʻi, ota-ona, amma-xola, amakiyu togʻalar oilaning keyingi hayot yoʻllarida katta-kichik rollarni oʻynaydi. Shu sabab bir umrlik yor tanlashda kelin yoki kuyov nomzodlar taraflarga manzur kelishi, oilaviy qadriyatlar bir-biriga mos boʻlgani maʼqul.

Javohirbek Abdullayev

Sevishib yoki kelishib turmush qurish har bir insonning individual sharoitiga bogʻliq. Juftingizni tanlashdan oldin nafaqat oʻzingiz, qolaversa, yaqinlaringizning oʻlchovlarini ham hisobga olishingiz kerak. Toʻliq oʻzboshimchalik va hech kimning fikriga quloq solmaslik yaxshi oqibatlarga olib kelmasligi mumkin. Barchasini bir maromda ushlash, vaziyatni moʻtadil nazorat qilishingiz lozim.


Juft tanlashdagi prioritetlar ham sizga qarab oʻzgaradi. Din, ilm, bilim va dunyoqarash boʻyicha boʻlgʻusi tushunmovchiliklarning oldini olish uchun avvaldan ushbu masalalarda kelishib, bir toʻxtamga kelgan afzal.

— Farzandingiz qanday sharoit, taʼlim va muhitda ulgʻayishini xohlaysiz?
Dilbar Umarova

Farzand uni tarbiyalashga maʼnaviy, psixologik, jismonan va moddiy jihatdan tayyor boʻlgan oilada dunyoga kelishi kerak. Bola ota-onaning cheksiz mehr va eʼtiborida yashashi kerak. Germaniyada turib nemislarning ota-onalik masalasini tashqaridan kuzatganim uchun boʻlajak farzandlarimizni tarbiyalashda ularning baʼzi amaliyotlarini qoʻllamoqchiman. Masalan:


  • Ota tarbiyada teng huquqli oʻyinchi. Bolalar bilan otalar hamma joy, oʻyin maydonchasi, akvapark, koʻcha, kafe, kutubxonada birga boʻladi. Yaʼni tarbiyaning butun yuki ona zimmasiga tushmaydi, balki ota-ona oʻrtasida taqsimlanadi.
  • Mustaqil bolani tarbiyalash va unga mustaqil shaxs sifatida munosabatda boʻlish. Farzandga ota-ona oʻzining hayotida amalga oshmagan orzularini yuklamasdan, yashashi uchun yaxshiroq yoʻlni oʻylab topmasdan, bolaning shaxsiy maydoni va shaxsiy manfaatlarini hurmat qiladi.
Temur Umarov

Alloh farzand nasib etsa, imkon qadar, uning orzulariga qarayman. U nimani yaxshi koʻradi, qanday maqsadlar qoʻyadi, qaysi sohaga qiziqadi – shularga urgʻu beramiz. Xohlasa, sartarosh boʻlsin, istasa, boshqa kasb egasi – farqi yoʻq. Oʻziga yoqsa, oʻz ishining ustasi boʻlsa, hayotidan zavq olsa, bas.

Mohina Nursaidova

Farzandli boʻlish juda jiddiy qaror. Bizda farzandga avvalo ovunchoq sifatida qaraladi. Oila qurildimi, ayni toʻqqiz oy oʻtishi bilan farzand dunyoga kelishi kerak degan yozilmagan qoida mavjud. Biroq farzandning taʼlimi uchun sarmoya, uning bilim olishi, qoʻshimcha darslari, sharoitlar yaratish uchun inson ham moliyaviy, ham ruhan tayyor boʻlishi kerak. Farzandli boʻla turib hanuz bola rolidan chiqa olmayotgan ota-onalar talaygina.

Ahror Sharif

Farzand tarbiyasi – juda masʼuliyatli masala. Ilgarigi – texnika inson hayotiga kirib kelmagan zamonlarda uning odobi, fanlarni oʻzlashtirishi asosiy omil hisoblangan. Bugun esa bolaning chet eldagi tengdoshlariga nisbatan raqobatbardoshligi, yangi bilimlarni oʻzlashtirishi, kelajakda yoʻqolib ketish xavfi ostida qolmaydigan kasbni egallashi haqida qaygʻurish muhimroq. Bu yoqimli, shu bilan birga, ota-ona zimmasiga katta masʼuliyat yuklaydi. Farzand masalasida songa emas, sifatga eʼtibor qaratish zarur deb hisoblayman.

Gulzoda Safarova

Farzandlarimiz tarbiyasida avvalo erkinlikni tanlayman. Bunda fikr erkinligi asosiy oʻrinda turadi. Taʼlim-tarbiyasida ham iqtidor va isteʼdodini yuzaga chiqaradigan, erkin muhit shakllangan boʻlishini xohlayman. Ularni oʻz yoʻrigʻimda yuritishdan uzoqman. Fikrlari, gʻoyalari, rejalarini doimo qoʻllab-quvvatlayman.

Xurshid Serobov

Bolaga koʻproq kitob oʻqitish yoki oʻqib berish shart. Kompyuterni mukammal oʻrganishi, oʻzbek maktabida oʻqishi, shu bilan bir qatorda chet tillardan kamida ikkitasini bilishi kerak. Bolalarda maktabdagi dars bilan birga mustaqil oʻqib, izlanishga koʻproq ishtiyoq uygʻotish foydali deb oʻylayman. Shuningdek, qiziqishlarini payqab, oʻziga yoqqan sohaga yoʻnaltira olish ham muhim.

Hilola Gʻayratova

Farzandni oʻziga ham, jamiyatga ham kerakli inson qilib oʻstiradigan eng muhim narsalardan biri – mutolaa. Turli janr va jahon adabiyoti namunalarini oʻqish imkoniyatlarni kengaytiradi. Bunga juda erta yoshdan eʼtibor berish kerak.

Timur Salimov

Yaponiyalik tadbirkor Masaru Ibuka «Uchdan keyin kech» kitobida uch yoshdan keyin bolani tarbiyalash, nimanidir oʻrgatish qiyinlashib borishini yozadi. Uch yoshgacha farzandning koʻrgan muhiti, olgan tarbiyasi uning hayotida poydevor vazifasini bajaradi. Masʼuliyat esa ota-onaga tushadi.

Dilafruz Abdullayeva

Farzand tarbiyasi boʻyicha hozircha tajribam boʻlmasa-da, oʻzim toʻgʻri deb bilgan jihatlarni aytib oʻtmoqchiman. Men uchun bu juda jiddiy masala. Chunki bolangiz sizni boringizcha, xato-kamchiliklaringiz, yutuqlaringiz bilan koʻrsatadi – aynan oʻzingizni takrorlaydi. Shunda savol paydo boʻladi, siz qanday insonsiz? Farzandingiz sizni takrorlashini istaysizmi? Javoblar esa bizni qayta tarbiyalanishga, illatlarimiz ustida ishlashga undaydi.

Javohirbek Abdullayev

Farzand tarbiyasi, uning qanday kamol topishi 95 foiz holatda ota-onaga bogʻliq. Qancha toʻgʻri mehr, eʼtibor va nazorat boʻlsa, farzand shuncha iqtidorli, bilimli va yaxshi insonga aylanadi. Koʻpchilik ota-onalar bolasining eng muhim davrlari —5-6-sinfdan keyin baholarni nazorat qilishni, uy ishlariga koʻmaklashishni, oʻqituvchi bilan aloqada boʻlib turishni toʻxtatib qoʻyadi. Bu esa uning eng zarur bilim va koʻnikmalarni egallashda ortda qolishiga sabab boʻladi.


Agar farzandingizning muhiti, maktabi, qiziqishlarini nazorat qila olmasangiz, dunyodagi eng kuchli taʼlim tizimiga ega davlatdagi maktab ham sizga yordam bera olmaydi. Oʻzbekistonda odatiy maktab, qoʻshimcha darslar va individual oʻqituvchilar yollash orqali ham yaxshi taʼlim olishini taʼminlasa boʻladi. Moddiy holatga bogʻliq boʻlmagan ayrim sabablar bilan chet elga chiqishga imkoningiz boʻlmasa, Toshkent shahridagi xorijiy maktablar sizga yordam berishi mumkin.

— Agar siz istagan muhit, imkoniyat mamlakatda boʻlmasa, qanday yoʻl tutasiz?
Dilbar Umarova

Menimcha, ketaman. Hayotda bir marta yashayman. Shuning uchun oʻzim, oilam va oʻzim yashayotgan jamiyat uchun imkon qadar foydali, baxtli, munosib yashashni xohlayman.

Temur Umarov

Men xohlagan sharoit va imkoniyatlar bu yerda boʻlmasa, chet davlatda yashashga ijobiy qarayman. Masalan, biz oilaviy 100 davlatni koʻrish va u yerda bir muddat qolishni niyat qilganmiz. Qolaversa, XXI asrda hech qanday chegaralar yoʻq. Chegara, aslida, ijtimoiy konstruksiya. Yaʼni u miyamizda bor xolos. Sayyoramiz – butun bir joy. Unga chegaralarni oʻzimiz oʻylab topganmiz.


Biz hozir yashab turgan va kelajakda yashaydigan davrimizda ham ish jarayonlari avvalgidan farqli holatda oʻzgarib ketadi. Koʻpchilik onlayn, istagan joyidan ishlash imkoniyatiga ega boʻladi. Bundan tashqari, ekologiya migratsiya jarayonlariga kuchli taʼsir oʻtkazadi. Yaʼni issiq ekvatorga yaqin boʻlgan davlatlar asta-sekin shimolroqqa migratsiya qilishga majbur boʻlishadi.

Mohina Nursaidova

Xorij davlatida yashash bir necha yil oldin orzu emasdi. Ammo sifatsiz taʼlim va yashash qadrining maʼlum koʻrsatkichlari qarashlar oʻzgarishiga sabab boʻlmoqda. Masalan, hozirgi shart-sharoitlaridan kelib chiqadigan boʻlsak, odam farzandini qaysi maktabga berishga ikkilanadi. Sifat va talabga javob bermaydigan oʻquv dargohlari va kelajakni oʻylash chetga ketishga undamoqda.

Ahror Sharif

Shu paytgacha chetga ketish fikri umuman tugʻilmagan. Oʻzbekistonda meni hamma narsa qanoatlantiradi. Oilam bilan chet elga ketishni orzu ham qilmaganman. Ehtimol, bu «komfort zona»ni tark etishdan choʻchiganim uchundir. Albatta, bir-ikki yil rivojlangan xorij mamlakatlaridan birida yashab, bilim, tajriba va dunyoqarashimni oshirib kelishga yoʻq demasdim.


Lekin doimiy ketish haqida gap boʻlishi mumkin emas. Oxirgi yillarda taʼlim, tibbiyot va boshqa sohalarga xususiy sektorning kirib kelgani, kirib kelishni rejalashtirayotgani hamda inson uchun zarur boʻlgan elementar muammolar hal qilinishiga vaʼda berilayotganini kuzatib, chetga ketish fikridan yanada uzoqlashmoqdaman.


Oʻzbekiston – men uchun yashashga eng qulay davlat. Bu yerda yaqinlarim koʻp, tinch va xavfsiz hayot kechirmoqdaman. Ishimda va shaxsiy hayotimda qiyinchilik va toʻsiqlarga duch kelmayapman. Boshqa davlatda yashash oson emas. Ayniqsa, oila bilan.

Gulzoda Safarova

Men ketgan boʻlardim. Bolalarim uchun ham chet oʻlkani tanlayman. Dunyo bilan hamnafas, oʻz «men»iga ega shaxs boʻlishlari uchun turmush oʻrtogʻim bilan qoʻlimizdan kelgan barcha ishni qilamiz.

Xurshid Serobov

Xorij davlatlariga faqat sayohat maqsadida boraman. Lekin yashash masalasida vatanda qolishni afzal bilaman. Men istagandek, muhit va sharoitlar boʻlmasa, oʻshani bor qilish uchun astoydil harakat qilaman. Orzularim faqat shu yurtda ushalishi kerak.

Hilola Gʻayratova

Istaklarimiz roʻyobga chiqishi uchun Oʻzbekistonda ham shart-sharoitlar bor deb oʻylayman. Albatta, hammasi joyida demayman, lekin keraklilari, yetarlilari bor. Aytaylik, farzandimizni kichkinaligidan olib borishimiz, ishonib topshirishimiz mumkin boʻlgan yaxshi bogʻchalar koʻp.


Boshqa mamlakatlarga yashash, daromad qilish uchun emas, maʼlum vaqt oʻzga muhitni oʻrganish, odatiy hayotdan sal chetlashish uchun borishim mumkin. Albatta, oilam bilan.

Timur Salimov

Hozircha Oʻzbekistonning oʻzida ham orzularim, maqsadlarimga erishsam boʻladi. Qaysidir vaqtda qandaydir nuqtaga kelib, maʼlum orzularimni amalga oshirishga koʻzim yetmasa, oʻzimga bogʻliq boʻlmagan sabablar bilan sharoitlar, yashash qoniqtirmasa, ketaman.


Albatta, davlat tanlashni ham bilish kerak. Rossiyada Neft va gaz universitetida magistraturani bitirganimda qolish imkoniyatim bor edi, lekin unday qilmadim. Rossiyani yashash uchun mos muhit, mamlakat deb bilmaganman. Biroq yana bir jihati bor – qanchalik koʻp vaqt bir mamlakatda tursangiz, yashasangiz, boshqasiga koʻchganingizda hammasini yana noldan boshlashga toʻgʻri keladi va buning ham qiyinchiliklari yoʻq emas.

Dilafruz Abdullayeva

Rivojlanish uchun chet elda boʻlib koʻrish kerak. Turmush oʻrtogʻim bilan maʼlum muddat chet elda yashash boʻyicha rejalarimiz bor. Oʻzga muhit, madaniyat, odamlar har tomonlama rivojlanishga sabab boʻladi.

Javohirbek Abdullayev

Agar biz istagandek muhit va sharoit Oʻzbekistonda boʻlmasa, vaqtinchalik yoki butunlay boshqa davlatga koʻchib ketishimiz mumkin. Chet elda avval ham yashab koʻrganman. Oʻylaymanki, bu katta qiyinchilik va noqulayliklar olib kelmaydi. Qolaversa, turmush oʻrtogʻim bilan bir soha – marketingda faoliyat olib boramiz. Unda biz hozirgi paytdagi daromadimizni saqlab qolgan holda istalgan joydan turib Oʻzbekistondagi loyihalar bilan shugʻullanishimiz ham mumkin.

— Oʻzbekistonda, qolaversa, tanlagan sohangizda zudlik bilan hal etilishi zarur qanday muammolar bor deb hisoblaysiz? Ularga qanday yechimni bergan boʻlardingiz?
Dilbar Umarova

Savolni javobsiz qoldirdi.

Temur Umarov

Marketing sohasida ishlayman. Koʻp mijozlarimiz marketingga xuddi kerak boʻlmagan xarajatdek qarashadi. Shuning uchun maktabdan boshlab oʻquvchiga biznes va bozor iqtisodiyoti prinsiplarini oʻrgatish kerak deb hisoblardim.

реклама
реклама
Mohina Nursaidova

Muammolarni ochiq aytishga qoʻrquv va senzura mavjud. Ertaga aytganlarim oʻzimga qarshi ishlashi ehtimoli ancha yuqori. Bu narsa avloddan-avlodga oʻtib kelmoqda. Ayni shu senzuralar yoʻqolishini istagan boʻlardim. Jamiyat rivoji uchun hozirda ilmiy tadqiqot olib bormoqdaman. Ikkinchi jahon urushi davrida qarshilik koʻrsatish harakatida Yevropadagi oʻzbeklarning faoliyatini oʻrganyapman. Yangidan-yangi maʼlumotlar topyapman. Shu ishda davom etishni istardim.


Asosiy orzularimdan biri esa dunyo standartlariga javob beradigan katta kitob burchagim boʻlishi: kutubxona (yoshlar va talabalarga tekin choy va yegulik bilan), kovorking joyi (bu ham talabalar va yoshlarga bepul), uning oldida juda katta kitob doʻkon va book cafe bilan. Xuddi shunday burchaklarni viloyat boʻylab filiallari boʻlishi va butun Oʻzbekiston yoshlari bemalol bilim oladigan tinch joyga aylanishini istardim.

Ahror Sharif

Ilgari oʻz sohasidagi muammolarni doimo gapirib yuradigan odamlar men uchun qahramondek tuyulardi. Biroq davlat ishidagi faoliyatim davomida bir narsani anglab yetdim: soha kishisi muammoni keng ommaga bildirib yurganidan hech qanday naf yoʻq. Aksincha, uni hal qilishga energiyasini sarflagani maʼqulroq. Shunda hamma yutadi – jamiyat bir muammodan xalos boʻladi, uni yechishga hissa qoʻshgan odamlar esa ishidan rohatlanadi.


Lekin hozirgi ishxonam – AKT vazirligi huzuridagi «UNICON.UZ» fan-texnika va marketing tadqiqotlari markazidagi bir anʼanani oʻrnak sifatida keltirsam boʻladi. Bu yerda TATU talabalari yarim stavkada ishga olinib, kadr sifatida tayyorlab boriladi. Bu ularning oliy taʼlimdan keyingi ish faoliyatini yoʻlga qoʻyib olishiga koʻprik vazifasini oʻtaydi. Qolgan tashkilotlarda ham ushbu tizimning yoʻlga qoʻyilishi mamlakatdagi yaxshi kadrlar muammosini hal qilishda yordam beradi deb oʻylayman.


Soha vakili boʻlmaganim uchun yangi ishga kelganimda hujjatlar bilan ishlash, ularni rasmiylashtirish, boshqa tashkilotlar bilan hujjat almashish ishlari boʻyicha umuman koʻnikmalarim yoʻq edi. Albatta, oʻqish jarayonida ishlamagan talaba buni qayerdan ham biladi? Talabalarning davlat tashkilotida yarim stavka ishlashiga yaxshi munosabat bildirish va keng qoʻllash maqsadga muvofiq. Chunki amaliyotda pishgan talabadan yaxshi kadr chiqishi ehtimoli baland.

Gulzoda Safarova

Taʼlim sohasini isloh qilish kerak. Shu oʻrinda oʻzim kelgusida soham boʻyicha yetuk mutaxassis boʻlib, oʻzbek tili rivojiga hissa qoʻshishga harakat qilaman.

Xurshid Serobov

Hamma aytgan gapni takrorlayman, afsuski. Taʼlim sohasini isloh qilish kerak. Oʻqituvchi degan sharafli kasbning obroʻsi tushib ketgani ham achinarli. Biror bola «kelajakda oʻqituvchi boʻlaman», deganini bu yaqin orada eshitmadim. Oʻzim esa barcha taklif va gʻoyalarimni badiiy asarlar qilib yozish niyatidaman. Yozganlarim bilan jamiyatning yaxshilanishiga bir ulush qoʻsholsam, mendan baxtiyor kimsa yoʻq.

Hilola Gʻayratova

Oʻzimning sohamdan kelib chiqib javob beraman. Sanʼatda ham boshqa sohalar singari nomunosib nomzodlar uchrab turadi. Bunga jamiyatdagi sanʼatga aloqasi boʻlmagan oddiy xalq ham aybdor. Chunki munosib boʻlmaganlar aynan ular tomonidan qoʻllab-quvvatlayotgani uchun ham mavjud.


Ham sanʼat vakilasi, ham bir shinavanda sifatida chetdan qarasam, odamlarga sayozlik yoqayotgandek tuyuladi. Talab haminqadar boʻlgani uchun sanʼatdagilar ham jiddiy ishlamayapti. Agar uncha-muncha narsa eshitilmaganda, hazm qilinmaganda, qiziqish bildirilmaganda edi ijodkorlar jiddiyroq, chuqurroq ishlashga harakat qilar, izlanib, kamchiliklarini toʻgʻrilardi. Doim talabga yarasha taklif boʻlgan.

Timur Salimov

Senzura. Televideniyeda ishlayman, muammo juda koʻp. Soqol, kiyinish, yoshlarni buzib yuboradi qabilidagi jumlalarni gapirmasa ham boʻladi. Hamma faoliyatingizni boshqarishga intiladi. Chetdan qilingan qoʻngʻiroqlar sabab koʻp koʻrsatuv, shoularimiz efirga ketmaydi. Bugun odamlarning telekanallardan uzoqlashayotgani sababi ham aynan senzurada.

Dilafruz Abdullayeva

Ikki-uch sohada faoliyat yuritadigan, turli sohalarda universitetlarni tamomlagan shaxs sifatida ayta olamanki, avvalo taʼlim dasturlarini qayta koʻrib chiqish kerak. Tan olish kerak, belgilangan nizomlarda har bir dars ortidagi maqsad va vazifalar aniq belgilangan, lekin amaliyotda ularga erishilmayapti. Demak, oʻrtada qayerdadir boʻshliq mavjud, aynan oʻsha boʻshliqqa barham berish kerak. Maqsadlar qogʻozlarda emas, bitirayotgan talabalar hayotida oʻz aksini topishi kerak. Bu maktabgacha taʼlim muassasalari va maktablarga ham taalluqli.


Hozir taʼlim sohasida faoliyat olib boryapman, aslida doim taʼlim bilan boʻlganman. Til oʻrganish, yangi sohalarni oʻrganish koʻplab muammolarga yechim boʻlishi mumkin. Insonni nafaqat jismonan, balki ruhan ulgʻayishiga turtki boʻladigan loyihalar koʻpayishini xohlardim. 2018-yili asos solingan «Your chance» yoshlar koʻngilli harakatimiz aynan shu kabi maqsadlarga qaratilgan.

Javohirbek Abdullayev

Oʻzbekistonda raqamli marketing sohasi endi-endi rivojlanib boryapti. Jarayonning davom etishi koʻproq shu soha mutaxassislariga bogʻliq. Afsuski, bizdagi davlat oliygohlari yaxshi marketolog yetishtirib bermaydi. Xususiy markazlar ham barmoq bilan sanarli. Sohani rivojlantirish uchun yangi, professional, amaliyot bilan taʼminlaydigan markazlar kerak.

Materialni Ziyoda Ramazonova tayyorladi.
Illyustratsiya: Eldos Fozilbekov / «Gazeta.uz».
Matn va barcha grafik materiallarga bo‘lgan huquqlar «Gazeta.uz» nashriga tegishli. «Gazeta.uz» internet-nashrida eʼlon qilingan materiallardan foydalanish shartlari bilan quyidagi havolada tanishishingiz mumkin.

Qiziqarli narsalarni bilasizmi? U haqida boshqalarga aytib bermoqchimisiz? O‘z hikoyangizni sp@gazeta.uz elektron manziliga yuboring.

Materialga izohlar

Izohni jo‘natish Chiqib ketish Bekor qilish Muallif: 6000 ta belgi qoldi.
"Gazeta.uz"da ro‘yxatdan o‘tish

Qo‘shimcha imkoniyatlarga ega bulish uchun saytda ro‘yxatdan o‘ting