Alisher Navoiy nomidagi O‘zbekiston Milliy kutubxonasi yaqin vaqt ichida haftasiga yetti kun, sutkasiga 24 soat ishlash rejimiga o‘tadi. Bu haqda Yoshlar ishlari agentligi direktori, senator Alisher Sa’dullayev ma’lum qildi.

«So‘rovingizga ko‘ra, AOKA va Alisher Navoiy nomidagi O‘zbekiston Milliy kutubxonasi rahbariyati bilan bog‘landim. Kutubxona tez orada 24/7 ishlash rejimiga o‘tishini ma’lum qilishdi. Hozir vazirlik va idoralar bilan jarayonni rasmiy yo‘lga qo‘yish ishlari davom etmoqda», — deb yozdi Sa’dullayev Twitter’dagi sahifasida.

Senatorning qo‘shimcha qilishicha, «jarayon boshlangan, AOKA va Milliy kutubxona hamma ishlarni amalga oshirmoqda». «Xodimlarning tungi ish vaqti, mehnat tartibi va maosh to‘lash masalasida ekan jarayon. Umid qilamizki, tez orada jarayonni yo‘lga qo‘yib yuborishadi», — deya qo‘shimcha qilgan u.

"Gazeta.uz"da reklama

Hozirda Milliy kutubxona ish kunlari 8:00 dan 21:00 ga qadar, dam olish (shanba va yakshanba) kunlari esa 9:00 dan 17:00 ga qadar kitobxonlarni qabul qiladi. Ayni vaqtda, «Nodir» noyob manbalar zali ish kunlari 9:00 dan 18:00 gacha faoliyat ko‘rsatadi, dam olish kunlari esa ishlamaydi.

Milliy kutubxonaning ish vaqtiga doir munozaralar Twitter mikrobloglar xizmatining o‘zbek segmentida 22 oktabr kuni boshlangan edi. Foydalanuvchi Miss Gatsby Twitter’da Alisher Sa’dullayevga murojaat qilib, «kvartirada va yotoqxonada turadiganlar uchun yagona o‘qish joyi» bo‘lgan Milliy kutubxonadan kitobxonlar dam olish kunlari soat 16:30 dan chiqarib yuborilishini, shu bois kutubxonani 24/7 rejimida ishlaydigan qilib berishni so‘ragan edi.

Alisher Sa’dullayev bu murojaatni o‘z sahifasida qayta ulashib, boshqa foydalanuvchilarning bu boradagi fikrini so‘ragan. Uning so‘roviga 150 ga yaqin javob qaytarilgan. Javoblarning aksariyatida foydalanuvchilar kutubxonaning 24/7 rejimida ishlashini olqishlagan, ish vaqtini hech bo‘lmasa 23:00 ga uzaytirish ham samarali bo‘lishi aytib o‘tilgan. Shuningdek, bir guruh foydalanuvchilar Milliy kutubxonaga kirib-chiqishni osonlashtirish zarurligini ta’kidlagan edi.

Ayni vaqtda, bir qator Twitter foydalanuvchilari bu kabi gap-so‘zlar birinchi marta aytilmayotganini eslatib o‘tgan.

Telegramdan foydalanasizmi? Muhim yangiliklarni o‘tkazib yubormaslik uchun kanalimizga a’zo bo‘ling.

Ma’lumot uchun, O‘zbekiston Milliy kutubxonasining ish vaqtini 23:00 ga qadar uzaytirish masalasi ko‘rib chiqilayotgani haqida muassasa rahbari Umida Teshaboyeva 2019 yil aprelida ma’lum qilgan edi. «Kechki vaqt ishlaydigan xodimlarga amaldagi qonunchilik bo‘yicha ish haqi to‘lash masalasi o‘rganilmoqda. Milliy kutubxona 23:00 ga qadar ishlashi uchun fondni saqlash, xizmat ko‘rsatish kabi bo‘limlarda 36 ta qo‘shimcha ish o‘rni yaratilishi talab etilar ekan. Bu masalalar ustida hozir ish olib borilmoqda», — degandi u.