Toshkent shahrida 15−16 iyun kunlari shimoliy yarim shardagi faol magnit bo‘ronining G3 darajali kuchga ega 4 ballik ta’siri kuzatilishi prognoz qilinmoqda, deb xabar berdi O‘zgidromet mutaxassisi Erkin Abdulaxatov.

Uning so‘zlariga ko‘ra, G3 daraja — ko‘pchilik uchun xavfli daraja emas. Biroq magnit bo‘ronlarining yuqori xavfli darajasi nafaqat, inson salomatligi, uning kundalik ish faoliyatiga, balki aloqa, energetika tizimlariga ham sezilarli ta’sir ko‘rsatadi.

«Magnit bo‘ronlari G3 darajali davrda ayrimlarda bosh qismining orqa tomonida kuchsiz og‘riq kuzatiladi. Bu paytda insonlarga kamroq harakat qilish hamda uyda ko‘proq o‘tirish tavsiya etiladi», — dedi mutaxassis.

Shuningdek, bu vaqt oralig‘ida yuqoridagi holatni o‘zida sezayotgan kishilarga chekish, alkogol mahsulotlari va kofe ichish hamda jismoniy zo‘riqish tavsiya etilmaydi. Ovqatlanish ratsioniga baliq va ko‘katlarni kiritish ma’qul.

SSV bosh nevrologi, tibbiyot fanlari doktori, professor Yoqutxon Majidovaning ta’kidlashicha, magnit bo‘roni inson salomatligiga salbiy ta’sir ko‘rsatadi, bundan ayniqsa, arterial gipertoniya xastaligiga chalingan bemorlar ko‘proq aziyat chekadi.

«Magnit bo‘roni bronxial astma bilan og‘rigan odamlar salomatligida ham muammolarni keltirib chiqarishi kuzatilgan. Shunday ekan, bunday vaziyatda, avvalo, ovqatlanish ratsioniga alohida e’tibor qaratish lozim. Ko‘proq ho‘l mevalar, qolaversa, mayiz va turshak kabi kaliyga boy mahsulotlar, tarkibida C vitamini ko‘p bo‘lgan banan va boshqa sitrus ne’matlardan iste’mol qilish zarur», — dedi u.

Uning ta’kidlashicha, surunkali kasalliklarga chalinganlar o‘zlari bilan shifokorlar tomonidan buyurilgan dori-darmonlarni olib yurishlari hamda qon bosimini tez-tez nazorat qilib turishlari lozim. «Kun davomida bir marta dush qabul qilish ham katta foyda beradi. Qon bosimidan shikoyati bor bemorlar ko‘proq suv ichib, sho‘r taomlarni kamroq iste’mol qilganlari ma’qul. Chunki tuz qon bosimi oshishiga sabab bo‘ladi», — dedi SSV bosh nevrologi.

Magnit bo‘ronlari — kompas magnit milining surilishini qo‘zg‘atuvchi Yer magnit maydonining keskin o‘zgarishi hisoblanadi. Magnit bo‘ronlari bir vaqtda Yer yuzining katta hududlarida, ba’zan butun Yer yuzida kuzatiladi. U ko‘pincha, tun vaqtiga to‘g‘ri keladi va odatda, qutbiy yog‘du, momaqaldiroq, zilzila paytida sodir bo‘ladi hamda har 11 yilda kuzatiladigan Quyosh faolligining kuchayishi davrida tez-tez takrorlanib turadi.