Vazirlik va idoralarning inson resurslarini boshqarish bo‘yicha faoliyatini baholash tartibini joriy etish ko‘zda tutilmoqda. Prezident huzuridagi Davlat xizmatini rivojlantirish agentligi departament mudiri Ilhom Qurbonov bu qanday amalga oshirilishini tushuntirib berdi.
Uning so‘zlariga ko‘ra, har yarim yillikda davlat organ va tashkilotlarining kadr siyosatini baholash bo‘yicha reyting e’lon qilib boriladi.
Yangi tartib uchun 1 oy davomida xorijiy tajriba, ikki hafta davomida 15 dan ortiq vazirlik va idoralar mutaxassislari ishtirokida o‘rganishlar olib borilgan. Natijada 10 ta asosiy va qo‘shimcha indikatorli reyting tizimi yaratildi. «Reyting ham baholovchi tashkilot, ham baholanayotgan subyekt tashkilot tomonidan birgalikda ishlab chiqildi. Ya’ni bu bilan o‘yin qoidalariga hamma rozi bo‘ldi», — dedi Ilhom Qurbonov.
Bunda, qo‘yidagi Baholash indikatorlari va ularni hisoblash usullaridan foydalaniladi:
Asosiy indikatorlar:
- davlat tashkilotidagi vakansiyalar darajasi;
- vakant lavozimlarning yopilish muddati;
- davlat tashkilotidagi qo‘nimsizlik darajasi;
- inson kapitalini rivojlantirish koeffitsiyenti;
- xodimlarning yuqori malaka darajasi ko‘rsatkichi (fan nomzodi, falfasa doktori, fan doktori);
- xalqaro e’tirof etilgan reyting beruvchi tashkilotlarning yuqori 500 talik ro‘yxatiga kiritilgan xorijiy OTMlarni tamomlagan xodimlar soni;
- «Yagona milliy mehnat tizimi» idoralararo dasturiy-apparat kompleksida majburiy ro‘yxatdan o‘tkazish darajasi;
Qo‘shimcha indikatorlar:
- ma’lumotlarni o‘z vaqtida va xatosiz taqdim etganlik bo‘yicha;
- umumiy xodimlardagi xotin-qizlar ulushi;
- umumiy xodimlardagi yoshlar ulushi.
Agentlik mutaxassisining ta’kidlashicha, birinchi o‘rinda vazirlik va idoralardagi vakant o‘rinlarni kamaytirishga e’tibor qaratiladi.
«Bu nimaga kerak? Ertaga tashkilotda qaysidir lavozim vakant bo‘lsa, unga tegishli funksiya tabiiy ravishda hozirgi kunda boshqa funksiyani bajarayotgan xodimga yuklanadi. Va bu xodimda qo‘shimcha ish hajmini paydo qiladi. Bu o‘z navbatida qator muammolarga — mehnat rejimini buzilishi, dam olish kunlari ishlashi yoki o‘sha funksiyani umuman bajarilmasligiga — olib keladi», — dedi u.
Reyting baholari formula orqali 100 ballgacha asosiy va 20 ballgacha qo‘shimcha ballari asosida aniqlanadi:
- «A’lo» daraja — 81 balldan 100 ballgacha;
- «Yaxshi» daraja — 71 balldan 80 ballgacha;
- «Qoniqarli» daraja — 55 balldan 70 ballgacha;
- «Qoniqarsiz» daraja — 54 ballgacha.
Baholashdagi indikatorlar ko‘rsatkichlari «Yagona milliy mehnat tizimi» idoralararo dasturiy-apparat kompleksiga integratsiya qilingan «Davlat fuqarolik xizmati yagona elektron axborot-tahlil tizimi» dasturiy-apparat kompleksi orqali aniqlanadi.
«Vazirlik va idoralarning shtatlari, tarkibiy tuzilmalari, lavozimlari, xodimlari ma’lumotlari, vakansiyalar, malaka darajalari — hammasi avtomatik tarzda chiqadi. Ertaga bizga ham e’tiroz bo‘lmaydi. O‘tirib, Excel`da hisoblash 20 asrda qolib ketdi. Biz buni har 6 oyda e’lon qilamiz. Dekin undan oldin hurmatli vazirlik va tashkilot rahbariyati mana shu ko‘rsatkichlarda muammo bor, e’tibor qilib qo‘yinglar, yaqinda reyting e’lon qilamiz deb aytamiz. Shu orqali kadrlar siyosatini yaxshilaymiz», — dedi u.
U shuningdek, hozirgi kunda vakant lavozimlarni yopish muddati 20 kun etib belgilangani, biroq hamma ham bunga amal qilmayotganini aytib o‘tdi.
«Ba’zida nomzodlarimizning tanlov komissiyalari tomonidan munosib deb topilmasligi, yanada yaxshiroq nomzod topish uchun qayta tanlovlar o‘tkazilishi vakant lavozimlar yopilmasligiga olib kelayapti», — dedi Ilhom Qurbonov.
Bundan tashqari, tashkilotlarning qo‘nimsizlik darajasi ham baholanishi aytildi. Agentlik vakili tashkilotda ma’lum bir muddat ichida xodimlarning tez-tez ishdan bo‘shashi ish muhitining yomonligidan darak beradi.
«Tashkilotda ish muhiti yaxshiligi, baqarorligi, psixologik va korporativ madaniyat yaxshiligi „qo‘nimsizlik“ darajasida ko‘rinadi. Agar juda ko‘p xodim ishdan bo‘shab ketgan bo‘lsa, demak qo‘nimsizlik darajasi yuqori va qanaqadir muammo borligini bildiradi», — dedi u.
