Turizm va sport vazirligi ikkiga ajralib, Turizm va madaniy meros vazirligi hamda Sportni rivojlantirish vazirligi etib qayta tashkil etildi. Bu haqda prezidentning 18 fevraldagi tegishli qarori dushanba kuni O‘zAda e’lon qilindi.
Hujjatda mamlakatda turizm xizmatlarini jadal rivojlantirish, ayniqsa, infratuzilmani yaxshilash, ziyorat va ichki turizm imkoniyatlaridan kengroq foydalanish, shuningdek, madaniy meros obyektlarini muhofaza qilishni kuchaytirish borasidagi ishlar samaradorligini tubdan oshirish zarurligi qayd etilgan.
Sport sohasida mahallalar va ta’lim muassasalarida sportni yanada ommalashtirish, sport bilan shug‘ullanish uchun barcha shart-sharoitlarni yaratish, o‘g‘il-qizlarning salomatligini mustahkamlash orqali aholini, jumladan, yoshlarni ham sportning barcha turlariga keng jalb etish, shuningdek, ayollarning, sog‘lom turmush tarzini targ‘ib qilish orqali keksalarning umrini uzaytirish zarur.
Bundan tashqari, sportchilarni Olimpiya va Paralimpiya, Osiyo va Paraosiyo o‘yinlari hamda xalqaro musobaqalarda ishtirok etishga har tomonlama puxta tayyorlash uchun sharoit yaratish zarur.
Shu tariqa, mazkur vazifalarni samarali bajarish hamda turizm va sport sohalarida boshqaruv sifatini oshirish uchun vazirlik ikkiga bo‘lingani ma’lum qilindi.
Turizm va madaniy meros vazirligining asosiy vazifalari:
- tashqi va ichki turizmni kengaytirish, yangi turistik marshrutlarni ishlab chiqish va ularni turistik bozorlarga olib chiqish, nufuzli xalqaro va milliy turizm tashkilotlari bilan hamkorlikni kengaytirish, turizm faoliyati va amaliyotiga xalqaro va davlatlararo standartlar va me’yorlarni joriy etish, mamlakatning turizm imidjini rivojlantirish;
- turizm turlarini kengaytirish, birinchi navbatda ichki va ziyorat, ekologik, etnografik, ishbilarmonlik, sport, gastronomik, tibbiy, ma’rifiy va ilmiy turizmni rivojlantirish bo‘yicha maqsadli chora-tadbirlarni ko‘rish, uning istiqbolli yo‘nalishlarini aniqlash va mamlakatning turizm salohiyatidan kelib chiqqan holda yangi turizm mahsulotlarini yaratish;
- madaniy meros obyektlarini aniqlash, hisobga olish, muhofaza qilish, targ‘ibot qilish, davlat reestrini, elektron katalogini, pasportini va davlat kadastrini yuritish, ushbu yo‘nalishda davlat nazoratini amalga oshirish, YUNESKO va boshqa xalqaro tashkilotlarning hujjatlar normalari va tavsiyalarini amalga oshirish, tarixiy merosni saqlash tarixiy va madaniy hududlarning madaniy qiymati, o‘ziga xosligi, tabiiy landshafti va o‘ziga xosligi;
- turizm xizmatlarini tashqi va ichki bozorlarda sotish, mamlakatning turistik salohiyatini ommalashtirish va targ‘ib qilish, milliy turizm mahsulotlari va brendlarini xalqaro turizm bozorlarida ommalashtirishga qaratilgan faol reklama-axborot siyosatini amalga oshirish;
- turizm infratuzilmasini shakllantirish, shu jumladan turistik obyektlarni joylashtirish, shuningdek ularga investorlarni jalb qilish, turizm sohasida tadbirkorlik faolligini oshirishga har tomonlama ko‘maklashish, turizmni samarali boshqarish uchun turizm salohiyatiga ega hududlarni rejalashtirish va loyihalash ishlarini tashkil etish. davlat-xususiy sheriklik asosidagi obyektlarni bosqichma-bosqich to‘liq raqamlashtirish.
Sportni rivojlantirish vazirligining asosiy vazifalari:
- har bir shaharcha, qishloq, ovul, shahar, posyolka va qishloqlar aholisini, ayniqsa, bolalar va yoshlarni sportni ommalashtirish, ommaviy sportga keng jalb etish va sog‘lom turmush tarzini qaror toptirish ishlarini tashkil etish, ularni sportga keng jalb etish; sport ta’limi tizimini doimiy asosda takomillashtirish va raqamlashtirish, sportda yuqori samarali sportchilar zaxirasini yaratish;
- sport infratuzilmasini rivojlantirish, jumladan, qishloq va chekka hududlarda sport inshootlarini ko‘paytirish, sport marketingini rivojlantirish, sport inshootlarini davlat-xususiy sheriklik asosida samarali boshqarish, sohani bosqichma-bosqich to‘liq raqamlashtirish, nodavlat sport inshootlari va muassasalari tarmog‘i, ularni davlat tomonidan qo‘llab-quvvatlash;
- mamlakatda professional sportni, jumladan, jamoaviy, qishki va ekstremal sport turlarini rivojlantirish, ilg‘or xalqaro tajribani hisobga olgan holda sport mashg‘ulotlari jarayoniga zamonaviy texnologiyalarni joriy etish, barcha sport turlari bo‘yicha milliy chempionatlarning saviyasi va sifatini oshirish, xalqaro va mintaqaviy sport musobaqalarini o‘tkazish, nosog‘lom sportga qarshi kurashish bo‘yicha tizimli chora-tadbirlar ko‘rilishini ta’minlash;
- Istiqbolli sportchilarni saralash (seleksiya), tayyorlash va malakasini oshirishning samarali tizimini yaratish, yuqori sifatli sport zaxirasini shakllantirish va ularning Olimpiya va Paralimpiya, Osiyo va Paraosiyo o‘yinlari, jahon chempionatlari, Osiyo va boshqa xalqaro musobaqa hamda turnirlarda muvaffaqiyatli ishtirok etishini ta’minlash;
- Paralimpiya harakatini rivojlantirish, shu jumladan jismoniy imkoniyatlari cheklangan va nogironligi bo‘lgan shaxslarning sport bilan shug‘ullanishi uchun sharoitlarni kengaytirish, uning infratuzilmasini yaratish, istiqbolli sportchilarni tanlash va professional sportga yo‘naltirish, shuningdek malakali mutaxassislarni unga jalb etish.
Eslatib o‘tamiz, Oliy Majlis Qonunchilik palatasi deputatlari tomonidan Aziz Abduhakimov Bosh vazir o‘rinbosari — Turizm va madaniy meros vaziri lavozimiga, Adxam Ikromov esa sportni rivojlantirish vaziri lavozimiga tasdiqlangandi.
Ma’lumot o‘rnida, Sport vazirligi hozirga qadar bir necha marotaba qayta tashkil etilgan. Bunga bloger, huquqshunos Xushnudbek Xudoyberdiyev ham e’tibor qaratdi.
O‘zbekiston mustaqillikka erishgan yillarda soha Fizkultura va sport davlat komiteti tomonidan boshqarilgan. 1992 yil 14 yanvarida Jismoniy tarbiya va sport davlat qo‘mitasiga o‘zgartirilgan.
2004 yilning 27 sentabriga kelib, prezident farmoni bilan Madaniyat ishlari vazirligi hamda sport sohasi birlashtirildi — Madaniyat va sport ishlari vazirligi etib qayta tashkil qilindi.
Hukumat 2017 yilning 15 fevralida esa Madaniyat va sport ishlari vazirligini ham ikkiga bo‘lishga qaror qiladi. Uning negizida Madaniyat vazirligi hamda Jismoniy tarbiya va sport davlat qo‘mitasi tashkil etiladi.
2018 yilning 5 martiga kelib esa Jismoniy tarbiya va sport davlat qo‘mitasi negizida Jismoniy tarbiya va sport vazirligi tuzildi.
2021 yilning 6 aprelida prezident farmoni asosida Jismoniy tarbiya va sport vazirligi hamda Turizmni rivojlantirish davlat qo‘mitasi yagona tuzilmaga — Turizm va sport vazirligiga aylantirildi.
2022 yilning 18 fevralida esa Turizm va sport vazirligi ikkiga ajratilib — Turizm va madaniy meros vazirligi hamda Sportni rivojlantirish vazirligi tariqasida qayta tashkil etildi.
