Korrupsiyaga qarshi kurashish agentligi Kinematografiya agentligi rahbari Firdavs Abduxoliqov va Sevimli telekanali rahbariyati afillanganligi bo‘yicha tekshiruvi yakunlarini e’lon qildi.
O‘rganish natijalariga ko‘ra, Kinematografiya agentligi tomonidan shartnomalar tuzilishida va davlat subsidiyasi mablag‘larining taqsimlanishida manfaatlar to‘qnashuviga yo‘l qo‘yilganligi holatlari aniqlandi.
Kinematografiya agentligi direktori Firdavs Abduxoliqov va uning yaqin qarindoshlari benefitsiar bo‘lgan (ta’sischilari: turmush o‘rtog‘i — Firuza Sadridinovna Sharapova — 70%, qizi — Amira Firdavsovna Rashidova — 20% hamda o‘g‘li — Abdullajon Firdavsovich Abduxalikov — 10%) “Master Media Production and Broadcast” MCHJ o‘rtasidagi manfaatlar to‘qnashuvi o‘z tasdig‘ini topdi.
Xususan, Kinematografiya agentligi direktori va bir vaqtning o‘zida subsidiya mablag‘larini taqsimlash bo‘yicha qarorlar qabul qilish vakolatiga ega Badiiy kengash raisi Firdavs Abduxoliqov manfaatlar to‘qnashuviga ega bo‘lsada, bu holatni bartaraf qilish choralarini ko‘rmasdan, mazkur jamiyat manfaatlarini yoqlab ovoz berishda va qarorlar qabul qilish jarayonida bevosita ishtirok etgan.
Misol tariqasida, 2021-yilning o‘zida Kinematografiya agentligi tomonidan berilgan davlat buyurtmalari asosida “Sevimli” telekanali (“Master Media Production and Broadcast” MCHJ) ishtirokida “Orzular palatasi” va “Tuzoq” seriallari suratga olingan.
Jumladan, 2021-yilning 22-fevral kuni Kinematografiya agentligi, “Master Media Production and Broadcast” MCHJ hamda “MY-FILMS” MCHJ o‘rtasida “Orzular palatasi” milliy serialini suratga olish maqsadida qiymati 3 mlrd so‘mlik shartnoma imzolanib, Kinematografiya agentligi tomonidan 1,5 mlrd so‘m pul mablag‘lari “MY-FILMS” MCHJ hisob raqamiga o‘tkazib berilgan.
Bundan tashqari, Kinematografiya agentligi hamda “Master Media Production and Broadcast” MCHJ o‘rtasida “Tuzoq” milliy serialini suratga olish uchun 2021-yilning 18-may kuni jami qiymati 1,8 mlrd so‘mlik ikki tomonlama shartnoma (dxarid.uz to‘g‘ridan-to‘g‘ri shartnoma orqali) imzolangan va 1,8 mlrd so‘m pul mablag‘lari jamiyat hisob raqamiga o‘tkazib berilgan.
“Shunga ko‘ra, mazkur holatlarda Kinematografiya agentligi bosh direktori Firdavs Abduxoliqov yaqin qarindoshlari ta’sischiligidagi MCHJning manfaatlarini ko‘zlab, davlat budjetidan juda ko‘p miqdordagi pul mablag‘larining ajratilishiga erishib, qonunbuzilishi holatlariga yo‘l qo‘ygan”, — deyiladi xabarda.
Korrupsiyaga qarshi kurashish agentligi tomonidan o‘rganish natijalari bo‘yicha to‘plangan hujjatlar qonuniy chora ko‘rish uchun Bosh prokuraturaga yuborildi.
