Uzbekistan Airways aviakompaniyasining Toshkent — Minsk reysini amalga oshirayotgan samolyoti Minsk milliy aeroportida uchish-qo‘nish yo‘lagidan chiqib ketdi.
Aeroport matbuot xizmati xabariga ko‘ra, hodisa taxminan soat 11:45 da kuchli qor yog‘ishi va bo‘ron paytida sodir bo‘lgan.
A320 samolyoti muvaffaqiyatli qo‘ndi, biroq boshqaruv paytida samolyot uchish-qo‘nish yo‘lagidan chiqib ketdi, deyiladi xabarda.
Samolyot bortida 115 nafar yo‘lovchi bo‘lgan. Dastlabki ma’lumotlarga ko‘ra, qurbonlar yo‘q. Hodisa oqibatida samolyotga zarar yetmagan.
Hozirda voqea joyida tez yordam xizmati ishlamoqda.
