7 yanvar kuni Qozog‘iston prezidenti Qosim-Jomart Toqayev yana xalqqa murojaat qildi.
«Terrorchilar davlat va xususiy mulkka zarar yetkazish, fuqarolarga qarshi qurol ishlatishda davom etmoqda. Men huquq-tartibot idoralari va armiyaga ogohlantirishsiz o‘ldirish uchun o‘t ochishni buyurdim», — dedi davlat rahbari.
«Xorijda tomonlarni muammolarni tinch yo‘l bilan hal etish bo‘yicha muzokaralar o‘tkazishga chaqirishmoqda», — dedi Qosim-Jomart Toqayev. — Qanday bema’nilik! Jinoyatchilar, qotillar bilan qanday muzokaralar olib borish mumkin?"
«Ham mahalliy, ham xorijlik qurolli va tayyorgarlikda o‘tkazilgan banditlar bilan kurashishimizga to‘g‘ri keldi. Aynan banditlar va terrorchilar bilan. Shuning uchun ularni yo‘q qilish kerak va bu yaqin kelajakda amalga oshiriladi. Huquq-tartibot kuchlari bu vazifani bajarishga ma’naviy va texnik jihatdan tayyor», — dedi prezident.
U Kollektiv Xavfsizlik Shartnomasi Tashkiloti kontingenti qisqa muddatga Qozog‘istonga himoya qilish va dastaklash vazifalarini bajarish uchun kelganini eslatib o‘tdi. Qozog‘iston prezidenti KXSHTga a’zo davlatlar rahbarlariga, xususan, Rossiya prezidentiga, shuningdek, XXR raisi, O‘zbekiston va Turkiya prezidentlariga, BMT va boshqa xalqaro tashkilotlar rahbarlariga minnatdorlik bildirdi.
«Demokratiya — bu boshboshdoqlik va ayniqsa noqonuniy harakatlarga gijgijlash degani emas, — deya ta’kidladi Qosim-Jomart Toqayev. — Olmaota va Qozog‘istonning boshqa shaharlari fojiasi ko‘rsatganidek, aynan qonunlarga rioya qilmaslik, boshboshdoqlik, anarxiya inson huquqlarining buzilishiga olib keladi. Olmaotada banditlar va terrorchilar qo‘lidan nafaqat ma’muriy binolar, balki tinch aholining shaxsiy mulki ham zarar ko‘rdi, yuzlab tinch aholi va harbiy xizmatchilarning salomatligi va hayoti haqida gapirmasa ham bo‘ladi».
Qozog‘iston prezidenti mamlakat qonunchiligida mitinglar o‘tkazish uchun ruxsat berish emas, balki xabardor qilish tartibi nazarda tutilganini eslatdi. Biroq, uning ta’kidlashicha, ba’zi o‘zini huquq himoyachilari va faollar deb ataydiganlar «o‘zlarini qonundan ustun qo‘yishadi va ular xohlagan vaqtda yig‘ilish va xohlagancha suhbatlashish huquqiga ega deb hisoblaydilar».
«Shu kabi faollarning noqonuniy xatti-harakatlari tufayli politsiya asosiy vazifasi — qonun va tartibni himoya qilishdan chalg‘itmoqda. Ular tez-tez zo‘ravonlik va haqoratlarga duchor bo‘lishmoqda. Shu kabi faollar tufayli, ta’bir joiz bo‘lsa, internet qisqarmoqda, buning oqibatida millionlab fuqarolar va mahalliy biznes manfaatlari zarar ko‘rmoqda», — dedi davlat rahbari.
«Xalqimizning tub manfaatlaridan uzoqda bo‘lgan erkin deb atalmish ommaviy axborot vositalari va xorijdagi arboblar huquq-tartibotni buzishda yordamchi va aslida rag‘batlantiruvchi rol o‘ynamoqda», — deb ta’kidladi Qosim-Jomart Toqayev.
«Biz huquqiy vandalizmning barcha aktlariga qattiq javob beramiz. Men banditlar va terrorchilarni qidirib, hibsga oladigan maxsus idoralararo guruh tuzdim. Fuqarolarimizga va’da beramanki, bu shaxslarning barchasi eng qat’iy jinoiy javobgarlikka tortiladi», — dedi prezident.
Davlat rahbari hukumat huquq-tartibot idoralari va armiya harakatlari munosabati bilan muhokamalar o‘tkazilishini ta’kidladi. «Shuningdek, maxsus kuchlar, maxsus vositalar va texnika yetarli emasligi ma’lum bo‘ldi. Biz bu masalalarni zudlik bilan hal qilamiz», — dedi u.
«Davlat nega jangarilarning „uxlab yotgan“ yacheykalarini yashirin tayyorgarlikdan o‘tkazilishiga befarq qolganini tushunish juda muhim, — dedi Qozog‘iston rahbari. — Olmaotaning o‘ziga 20 ming bandit hujum qildi. Ularning aksiyalari qariyb barcha hududlarda harbiy, ma’muriy va ijtimoiy obyektlarga hujum qilishning aniq rejasi, muvofiqlashtirilgan o‘zaro uyg‘un harakatlar, yuqori jangovar tayyorgarlik va vahshiy shafqatsizlik mavjudligini ko‘rsatdi».
Jangarilardan tashqari, dezinformatsiya yoki soxta ma’lumotlardan foydalangan holda mafkuraviy sabotaj bo‘yicha o‘qitilgan va odamlarning kayfiyatini boshqarishga qodir mutaxassislar ham borligini aytdi.
«Aftidan, bitta qo‘mondonlik punkti ularni tayyorlash va boshqarish bilan shug‘ullangan. Bu bilan Milliy xavfsizlik qo‘mitasi va Bosh prokuratura shug‘ullana boshladi», — dedi Qosim-Jomart Toqayev.
Davlat rahbari, shuningdek, vaziyat barqarorlashishi munosabati bilan «mamlakatning ayrim hududlarida ma’lum muddatga» internetni yoqishga qaror qilganini aytdi.
«Ammo men sizni ogohlantiramanki, internetga erkin kirish uydirmalarni, tuhmatlarni, haqoratlarni, gijgijlovchi chaqiriqlarni bemalol joylashtirishni anglatmaydi. Agar shunday materiallar paydo bo‘lsa, ularning mualliflarini aniqlash va jazolash choralarini ko‘ramiz», — dedi prezident.
«Terrorga qarshi operatsiya davom etmoqda. Jangarilar qurollarini qo‘ygani yo‘q, jinoyat sodir etishda yoki ularga hozirlik ko‘rishda davom etmoqdalar. Ularga qarshi kurash yakunlanishi kerak. Taslim bo‘lmaganlar yo‘q qilinadi», — dedi Qosim-Jomart Toqayev.
Prezident oldinda fojiadan saboq olish, jumladan, ijtimoiy-iqtisodiy nuqtai nazardan ham ko‘p ishlar turganini ta’kidlab, 11 yanvar kuni Majlisda e’lon qilishni rejalashtirayotgan hukumatning yangi qarorlarini ma’lum qildi.
«Hozir, aziz vatandoshlar, sizlar bilan faxrlanishimni aytmoqchiman. Shu kunlarda osoyishtalikni saqlab, barqarorlik va jamoat tartibini ta’minlashga harakat qilgan Qozog‘iston fuqarolariga o‘z minnatdorchiligimni bildiraman. Provokatsiyalarga, buzg‘unchi chaqiriqlarga qaramay, siz qonunga, o‘z yurtingizga sodiq qoldingiz», — dedi davlat rahbari. Prezident namoyishlar tinch o‘tgan viloyatlar aholisiga ham minnatdorchilik bildirdi.
«Biz tinch yo‘l bilan aytilgan barcha talablarni eshitdik. Muloqot natijasida murosaga erishildi, o‘tkir ijtimoiy muammolarni hal etish yo‘llari ishlab chiqildi. Shu bois barqaror vaziyat saqlanib qolgan hududlarda favqulodda holat tartibini bosqichma-bosqich olib tashlaymiz», — dedi u yakunida.
