Afg‘oniston muvaqqat hukumati hisob-kitoblar uchun xorijiy valyutadan foydalanish to‘liq taqiqlaganini e’lon qildi, deb xabar berdi Reuters agentligi.
Afg‘oniston bozorlarida AQSh dollaridan foydalanish keng tarqalgan bo‘lsa, Pokiston kabi qo‘shni davlatlarning valyutasi chegara hududlarida savdo qilish uchun ishlatiladi.
«Mamlakatdagi iqtisodiy vaziyat va milliy manfaatlar barcha afg‘onlardan o‘z hisob-kitoblarida afg‘on valyutasidan foydalanish talab qilinadi», — deyiladi «Tolibon» bayonotida.
Bundan tashqari, muvaqqat hukumat mamlakat qurg‘oqchilik va naqd pul taqchilligiga duch kelgani sababli, markaziy bankning xorijiy yurisdiksiyalardagi milliardlab dollar zaxiralarini bo‘shatishga qaror qildi.
Eslatib o‘tamiz, 17 avgust kuni The Washington Post gazetasi o‘z manbalariga tayanib, AQSh prezidenti Jo Bayden ma’muriyati Afg‘oniston hukumatining Amerika bank hisoblaridagi zaxiralarini muzlatib qo‘ygani haqida xabar bergan edi. Bundan tashqari, Qo‘shma Shtatlar Afg‘onistonga toliblar qo‘liga tushib qolmasligi uchun katta miqdorda dollar yetkazib berishni bekor qilgani qayd etilgan. Mamlakatdan qochib ketgan Afg‘oniston Markaziy banki rahbari v. b. Ajmal Ahmadiy Tvitterda Afg‘oniston Markaziy bankining deyarli barcha zaxiralari xorijda joylashgani va ular taxminan 9 milliard dollarni tashkil etishini ma’lum qildi. Eng katta qismi — 7 milliard dollar — Federal zaxira tizimi hisoblarida.
Birlashgan Millatlar Tashkilotining Oziq-ovqat va qishloq xo‘jaligi tashkiloti (FAO) ma’lumotlariga ko‘ra, 2021 yilda qurg‘oqchilik va hosil yetishmovchiligi tufayli 14 milliondan ortiq afg‘on oziq-ovqat bilan ta’minlanmagan va shoshilinch insonparvarlik yordamiga muhtoj.
Joriy yilning oktabr oyida BMTning Qochqinlar bo‘yicha agentligi Termizga Afg‘oniston uchun 100 tonnadan ortiq insonparvarlik yordami yetkazib berdi. Biroq 27 oktabr holatiga ko‘ra, yuk Afg‘onistonga hali yetkazilmagan, chunki mamlakat rasmiylari uni olib kirishga ruxsat bermagan.
