Afg‘onistonda hokimiyatni qo‘lga kiritgan «Tolibon» harakati Tojikiston bilan chegarada muntazam bo‘linmalarni joylashtiradi. Qayd etilishiga ko‘ra, harakatning 150 nafar jangchilari Tojikiston bilan umumiy chegaraga ega bo‘lgan shimoli-sharqdagi Taxor viloyatida qisqa muddatli harbiy tayyorgarlik kurslarini o‘tadi. Bu haqda TASS Bakhtar agentligi ma’lumotlariga tayanib xabar berdi.
Aniqlik kiritilishicha, tayyorgarlikdan o‘tgan «Tolibon» jangchilari tojik-afg‘on chegarasini qo‘riqlashadi va Taxor aholisining xavfsizligini ta’minlashadi.
«Biz harakat a’zolaridan va sobiq hukumat armiyasi harbiylaridan tashkil topgan muntazam armiya tuzmoqdamiz va boshqa davlatning bostirib kirishiga yo‘l qo‘ymaymiz», — dedi «Tolibon» bo‘linmalarining Mozori Sharif shahridagi (O‘zbekiston, Tojikiston va Turkmaniston bilan chegaradosh Balx viloyati ma’muriy markazi) qo‘mondoni Mavlavi Ataulla Omariy.
«Islom Amirligi (Afg‘oniston Islom Amirligi — toliblar tomonidan tuzilgan hukumat nomi) maxsus kuchlari Taxor viloyatidagi qo‘mondoni Mavlavi Xuzayfa bitiruv marosimida jangchilar yaxshi harbiy tayyorgarlikdan o‘tganini va odamlar xavfsizligini ta’minlash hamda chegaralarni himoya qilishga tayyorligini aytdi», — deb yozmoqda «Gazeta.ru».
sentabr oyining oxirida Afg‘onistonni boshqarayotgan «Tolibon» Tojikistonga tahdid solgan edi. Undan avval, Tojikiston hukumati qarshilik ko‘rsatilayotgan so‘nggi hudud — Panjsher viloyati toliblar tomonidan bostirilayotganini qoralagan edi. Ular, shuningdek, «bu mamlakatda zulm va ta’qiblar natijasida tuzilgan boshqa Afg‘oniston hukumatini» tan olmasliklarini bildirishdi. Ikki davlat chegarasidagi vaziyat og‘irlashayotgani qayd etilgan.
