5-oktabr kuni Microsoft kompaniyasi Windows 11 operatsion tizimini chiqardi, deya xabar qilmoqda «Korrespondent» nashri. Xabarda aytilishicha, kompaniya yangi versiyadagi operatsion tizimni Windows 10 uchun bepul yangilanish sifatida taqdim qildi.
Kompaniya Windows 11`ni turkumdagi «eng xavfsiz» operatsion tizim, deya e’tirof etganligi aytilmoqda. Windows 10 o‘rnatilgan, Windows 11`ga mos keluvchi barcha kompyuterlar taxminan 2022 yil o‘rtalarigacha yangi operatsion tizimga o‘tishi kutilmoqda.
«Microsoft korporatsiyasi Windows 11 operatsion tizimini rejalashtirilgan muddatidan bir kun oldin chiqardi. Operatsion tizimning yangi versiyasi AQSh vaqti bilan 5-oktabrda chiqarilishi kerak edi, lekin u AQSh vaqtiga ko‘ra 4-oktabr sanasidayoq foydalanuvchilarga taqdim etildi» — deya yozmoqda nashr.
Ma’lum qilinishicha, tizim Windows yangilanish markazi orqali kompyuterning yaroqliligiga qarab to‘lqinlarda tarqatiladi. Windows 11`ni mustaqil o‘rnatmoqchi bo‘lganlar Microsoft rasmiy saytidan o‘rnatish bo‘yicha yordamchini yuklab olishlari mumkin.
Windows 10 o‘rnatilgan kompyuterlar operatsion tizimni keyingi versiyaga bepul yangilashi mumkinligi aytilgan. Boshqa foydalanuvchilarga kompyuterlari tizim talablariga minimal darajada javob berishi sharti bilan dasturiy ta’minotni bosqichma-bosqich yangilash taklif qilinadi.
Windows 11`ni o‘rnatish uchun texnik talablar
Qayd etilishicha, Windows 11 kompyuterga yuqoriroq talablar qo‘yadi. Microsoft Windows 11 qurilmada ishlashi yoki ishlamasligini aniqlaydigan shaxsiy kompyuterni tekshirish dasturini (PC Health Check) ishlab chiqqan. Dasturni kompaniyaning veb-saytidan yuklab olish mumkin.
Qurilma Windows 11`ni qo‘llab-quvvatlashi uchun minimal tizim talablari:
- 1 gigagers yoki undan yuqori chastotali ikki yadroli mos protsessor;
- 4 Gb operativ xotira;
- 64 Gb ichki xotira;
- DirectX 12 yoki undan yuqori versiyasini qo‘llab-quvvatlaydigan videokarta;
- 9 dyuymli va 720 yoki undan yuqori piksellar soniga ega bo‘lgan displey;
- TPM 2.0, UEFI va Secure Boot moduli bilan mos kelish.
Agar sizning qurilmangiz minimal talablarga javob bermasa, Windows 11`ni o‘rnatish yordamchisi bilan bitta sahifada joylashgan ISO fayli orqali o‘rnatishingiz mumkin. Microsoft bunga qarshilik qilmaydi, lekin kompaniya tizimning to‘liq mosligi yoki ishonchli ishlashiga kafolat bermaydi.
Microsoft operatsion tizim interfeysini qayta ishlab chiqdi va unga bir qancha o‘zgartirishlar kiritdi. Microsoft Windows 11`ning asosiy funksiyalaridan quyidagilarni sanab o‘tdi:
- yangi dizayn (dumaloqlangan burchaklar, Mac`nikiga o‘xshash intefeys);
- Microsoft Teams suhbatini vazifalar paneliga birlashtirish;
- bulutda ishlash uchun ko‘proq imkoniyatlar;
- yangi Microsoft Store ilovalar do‘koni (bu yerda Android mobil operatsion tizimi uchun ilovalar va Linux ilovalarini birlashtirish rejalashtirmoqda);
- sensorli ekranlar bilan ishlash va ovozli kiritish uchun tizimni optimallashtirish.
Windows 11`ga qanday o‘tish mumkin
Ayni paytda Windows 10`ni qo‘llab-quvvatlaydigan yoki Windows 11`ga yangilashga ruxsat berilgan qurilmalarga ega bo‘lganlar uchun yangilash bo‘yicha ba’zi tavsiyalar:
- kompyuteringiz Microsoft PC Health Check orqali yangilanishlarni qo‘llab-quvvatlashini tekshiring;
- barcha muhim hujjatlar, ilovalar va ma’lumotlarning zaxira nusxalarini yarating;
- «Sozlamalar»ga o‘ting, «Yangilanish va Xavfsizlik»ni, so‘ngra «Windows yangilanish markazi»ni tanlang.
Agar Windows 11`ning bepul yangilanishi mavjud bo‘lsa, yuklab olish va o‘rnatish opsiyasi menyuda paydo bo‘ladi, keyin ko‘rsatmalarga amal qilish lozim bo‘ladi.
Foto: Microsoft
Agar bu band yo‘q bo‘lsa, siz korporatsiya veb-saytida mavjud bo‘lgan Microsoft`dan yangi o‘rnatish dasturidan foydalanishga urinib ko‘rishingiz mumkin.
Windows 11 bir yilda bir marta yirik yangilanishni talab qiladi, yangilanishlarning o‘zi 40 foiz kichikroq bo‘ladi va fonda o‘rnatiladi.
Windows 10`ni qo‘llab-quvvatlash muddati 2025 yil 14-oktabrda tugashi aytilmoqda.
