O‘zbekiston Olimpiya terma jamoasi vakillari Tokioda bo‘lib o‘tgan yozgi Olimpiya o‘yinlari ochilish marosimida Ideal brendi kostyumlarida chiqdi. O‘yinlar uchun sportchilarning ekipirovkasi va sport kiyimlarini esa 7SABER tayyorladi. «Gazeta.uz» forma qay tarzda tanlangani va ishlab chiqaruvchilar haqida ma’lumot to‘pladi.
Milliy olimpiya qo‘mitasi «Gazeta.uz»ga Olimpiya o‘yinlarining ochilish marosimida chiqish uchun sportchilarning parad formasini Ideal (Ideal Business Center), ekipirovka va sport kiyimlarini esa 7SABER (Urban Hayot) brendi ishlab chiqarganini tasdiqladi.
2020 yilning fevralida MOQda Tokioda bo‘lib o‘tadigan Olimpiya va Paralimpiya o‘yinlarida O‘zbekiston delegatsiyasi uchun sport ekipirovkasi va parad formasi taqdimoti bo‘lib o‘tdi. Qo‘mita forma eskizini yaratish bo‘yicha xalqaro tanlovda 100 dan ortiq nomzodlar qatnashganini xabar qilgandi. Tanlangan namunalar prezident va Hukumatga taqdim etildi, Shavkat Mirziyoyev o‘zining ijobiy fikrini bildirdi, deyilgandi xabarda.
Toshkent to‘qimachilik va yengil sanoat instituti prorektori Holida Komilova sportchilarning tasnifiga qarab, har bir komplekt individual tarzda yaratilishini ta’kidlagandi.
Yakunda esa sportchilar Tokioga boshqa parad formasi va boshqa ekipirovakada yo‘l olishdi.
Ideal Business Center rahbari Muhammadjon Qodirov «Gazeta.uz»ga MOQ Olimpiya terma jamoasi uchun parad formasi dizayni bo‘yicha tenderni 2019 yilning oxirida e’lon qilganini ma’lum qildi.
«Tender e’lon qilingan va dizaynerlar o‘z lavhalari, loyihalarini bergan. Shundan 10 tasi tanlangan. O‘ntasidan keyin saralangan 5−6 ta loyiha bosh vazirga ko‘rsatilgan va yakuniy natija prezident tomonidan tanlagan», — dedi u.
Uning so‘zlariga ko‘ra, Ideal tasdiqlangan dizayn asosida formani tikish ishlari bilan shug‘ullangan.
«Dizaynini tanlashda ham qatnashganmiz. Konkursda ikki nafar nomzodning dizayni tasdiqlangan. Ya’ni bitta dizaynerning modelidan rang olingan va qoliplar, fasoni esa bizniki bo‘lgan», — dedi kompaniya rahbari.
Muhammadjon Qodirov gap dizaynni tanlash bo‘yicha o‘tkazilgan tender haqida ketmoqda — tikish bilan shug‘ullanuvchi kompaniya esa oldindan ma’lum bo‘lgan.
«2016 yildagi Olimpiadaga ham formani biz tikkanmiz. Jahon chempionati boksyorlari yutib kelib, bayramda oq qostyum shimda chiqishdi — uni ham biz qildik», — dedi u.
Prezidentning 25 iyundagi қарориga muvofiq, delegatsiyaning rasmiy ekipirovkasi (forma kiyimi — kostyum, shim, ko‘ylak, galstuk, belbog‘, oyoq kiyimi) umumiy qiymati 430 mln so‘mga (215 nafar ishtirokchining har biriga 2 mln so‘mdan) tushgani qayd etilgan.
2020 yilgi taqdimotdan Buka (brend egasi Buka Boxing Sportswear) logotipi tushirilgan formani ko‘rish mumkin. Biroq sportchilar Tokioga Urban Hayot ekipirovkasida yo‘l oldi. 7SABER mahalliy brendining taqdimoti 25 iyun kuni o‘tkazilgan edi.
Shu bilan birga, ayrim sportchilarda (Ulug‘bek Rashitov, Bahodir Jalolov) bahordan beri ushbu brend formasida ekanligini ko‘rish mumkin.
7SABER`ga tayanib Spot nashrining xabar qilishicha, brend tarixi 2019 yil boshiga borib taqaladi. O‘shanda Triatlon federatsiyasining sobiq rahbari Otabek Umarov butun dunyoga mashhur bo‘lgan ikonkalar asosida turli sport turlarini tasvirlaydigan grafik elementni yaratgan.
Otabek Umarov tomonidan yaratilgan grafik belgi.
Uzoq vaqt mobaynida logotipning tijoratga hech qanday aloqasi yo‘q edi: muallif uni sport tashkilotlari va ishlab chiqaruvchilari tomonidan erkin foydalanishiga e’tiroz bildirmadi.
Bu professional sportchilar bilan birga ishqibozlar orasida ham birdek brend mashhurligining oshishiga ta’sir ko‘rsatdi. 7SABER`da buni milliy marketingning namunasi deb atashdi.
O‘zbekiston taekvondochilari Tokioga safari oldidan. Foto: MOQ.
2020 yili sport ekipirovkasini ishlab chiqarishga sarmoya kiritmoqchi bo‘lgan Dubayning Berkeley Square Investments kompaniyasi O‘zbekistonda marketing o‘rganishlarini olib bordi. Element mamlakatda mashhurlik va sodiqlikka ega ekanligi aniqlandi, deb yozadi nashr.
Berkeley Square Investments rahbariyati O‘zbekistonda o‘z manfaatlarini ifodalovchi Urban Hayot kompaniyasi orqali muallif bilan muzokaralarga kirishdi. Yakunda esa litsenziya bitimi imzolandi.
Emblemadan foydalanish huquqi 5 yil muddatga Urban Hayot kompaniyasiga o‘tdi. U 2020 yilning 2 dekabrida Toshkentda ro‘yxatdan o‘tgan. Kompaniya ta’sischilari Ross Konnon va Oraz Abdurazakov (hozir aksiyalar quyidagicha taqsimlangan: Berkeley Square Investments — 80,2%, Oraz Abdurazakov — 19,8%) hisoblanadi. Kelishuvga erishish vaqtida logotipning na fonetik eshitilishi, na aniq nomlanishi bo‘lgan — u faqat dizaynga ega edi.
Brend yaratilishiga INSTID London san’at instituti va Toshkent GRANDPR agentligi jalb etilgan va shu tarzda 7SABER paydo bo‘lgan, deb yozmoqda Spot.
Otabek Umarov shunday degan edi: «qalbga qadrli bo‘lgan loyihaning qayta tug‘ilishini ko‘rish — juda ajoyib tuyg‘u».
«Bir necha yil avval qalam eskizlari va bolalar sport maktablari uchun ilk kiyimlar to‘plamida yaratilgan g‘oya kecha yangi yorqin brend sifatida namoyish etildi. Bir nechta ixlosmandlarning tashabbusidan katta sarmoyaviy loyihaga qadar bo‘lgan yo‘l eng qisqa vaqt ichida bosib o‘tildi. Endi boshqalar loyihani davom ettirsinlar, men avval ixtiro qilgan belgi yaxshi qo‘llarda ekanligiga shubham yo‘q», — deya yozgandi o‘zining Instagram sahifasida.
O‘zbekistonlik og‘ir atletikachi Muattar Nabiyeva 7SABER sport formasida. Foto: MOQ.
Otabek Umarov, shuningdek, «Berkeley Square Investments kompaniyasidan eng asosiy talabi va olgani — kamida 2000 ta ish o‘rni yaratish bilan O‘zbekistonda sport kiyimlari ishlab chiqarishni ochish kafolatlari» ekanligini qayd etgan.
Prezidentning 25 iyundagi qarori bilan (PP-5160) O‘zbekiston Milliy olimpiya qo‘mitasiga hamda O‘zbekiston Milliy paralimpiya qo‘mitasiga Olimpiya va Paralimpiya o‘yinlariga tayyorgarlik ko‘rish uchun sport anjomlari, jihozlar, uskunalar, delegatsiya rasmiy liboslari, sport kiyimlari (ekipirovkasi), sport tibbiyoti jihozlari, tibbiy-biologik preparatlar xarid qilish bo‘yicha xorijiy va mahalliy ishlab chiqaruvchilar bilan shartnomalarni, shuningdek, o‘quv-mashg‘ulot yig‘inlari bo‘lib o‘tadigan sport bazalari, yotoqxona, sport zallari va sport jihozlari ijaralari to‘g‘risida hamda ovqatlanishni tashkil qilish yuzasidan shartnomalarni to‘g‘ridan-to‘g‘ri rasmiylashtirish va to‘lovlarni amalga oshirishga ruxsat berildi
Shuningdek, istisno tariqasida, davlat xaridlari bo‘yicha maxsus axborot portalida tegishli e’lon joylashtirmasdan va elektron savdolarsiz, tendersiz, to‘g‘ridan-to‘g‘ri rasmiylashtirish va to‘lovlarni amalga оширishga ruxsat berildi.
